Vilhjálmur Þ. Vilhjálmsson, borgarstjóri, sagði á aukafundi borgarstjórnar um Reykjavik Energy Invest í dag, að neikvæð umræða hefði vegið að Orkuveitunni, hinu nýja fyrirtæki og borgarstjórn Reykjavíkur. Sagðist Vilhjálmur hafa sætt afar ómaklegum árásum og hann tæki þær nærri sér. Enginn hefði farið í þessa vegferð til að vinna skaða heldur haft hagsmuni almennings í huga.

Vilhjálmur sagði, að samruni Reykjavik Energy Invest hefði verið samþykktur með atkvæðum fulltrúa Sjálfstæðisflokks, Framsóknarflokks og Samfylkingar en VG setið hjá. Verið væri að slá ryki í augu fólks, með því að gefa til kynna, að eitthvað annað hafi gerst en samþykkt var.

Dagur B. Eggertsson, borgarfulltrúi Samfylkingar, sagði á fundinum, að flokkurinn vildi fá öll gögn málsins upp á yfirborðið ef með því væri hægt að leiðrétta þau mistök, sem gerð hefðu verið, endurvakið orðstír Orkuveitu Reykjavíkur, endurunnið traust borgarstjórnarinnar, en menn stæðu frammi fyrir því, að borgarstjórinn væri rúinn trausti og hefði orðið margsaga í málinu og meirihlutinn riðaði til falls.

Vilhjálmur sagðist sem borgarstjóri vilja leggja öll spil á borðið en sagði jafnframt, að þeir sem hefðu leitað eftir gögnum hjá REI eða OR hefðu fengið þau, ella hefði borgarfulltrúi Samfylkingar tæplega tekið þátt í að samþykkja þetta mál.

Sagðist Vilhjálmur hafa starfað að borgarmálum í 25 ár og aldrei áður verið sakaður um ósannindi með líkum hætti og einn borgarfulltrúi hefði gert.

Þá sagði Vilhjálmur að ekki væri hægt að leyfa sér að halda því fram, að gengi bréfa fyrirtækisins muni hækka og hækka og því eigi ekki að selja hluta Orkuveitunnar strax. Slíkt sé ekki hægt að sjá fyrir. Vilhjálmur sagðist hins vegar vera tilbúinn til að setjast með fulltrúum minnihluta borgarstjórnar og leita lausna í málinu því umræða af þessu tagi, sem farið hefði fram að undanförnu, væri skaðleg fyrir fyrirtækið og starfsmenn þess.

Vilhjálmur sagði, að samrunaferli REI og Geysis Green Energy taki 6 vikur og að því loknu væru sjálfstæðismenn sammála um að leitað verði til færustu sérfræðinga um ráðgjöf um sölu á hlut Orkuveitu Reykjavíkur í fyrirtækinu.