Umboðsmaður Alþingis gerir ekki athugasemd við að rektor Háskóla Íslands hafi ekki veitt Ágústi Einarssyni, rektor Háskólans á Bifröst launalaust leyfi frá störfum við HÍ í þrjú ár. Umboðsmaður Alþingis hefur hins vegar sent rektor HÍ bréf þar sem hann kemur með ákveðnar ábendingar varðandi stjórnsýslu HÍ í máli Ágústs.

Á vef Umboðsmanns Alþingis kemur fram að ekki sé óalgengt að kennarar við HÍ hafi fengið launalaust leyfi til þess að sinna öðrum störfum en í engu tilviki hafi verið um að ræða stjórnunarstöðu á borð við rektorsstöðu í háskóla sem væri í samkeppni við Háskóla Íslands. Því gerði umboðsmaður ekki athugasemd við ákvörðun Háskóla Íslands um að verða ekki við beiðni um launalaust leyfi.

Í bréfi umboðsmanns til háskólarektors kom m.a. fram að almennar reglur um launalaust leyfi kennara og þeirra sem ráðnir voru til vísinda- og fræðistarfa frá störfum hefðu ekki verið settar þegar mál Ágústs kom upp. Þrátt fyrir að mælt væri fyrir um í 5. mgr. 11. gr. laga nr. 41/1999, um Háskóla Íslands, að háskólaráð setti slíkar reglur hefði háskólinn látið hjá líða að setja reglurnar. Það hefði ekki verið fyrr en á fundi háskólaráðs hinn 11. janúar 2007 sem ákveðið hefði verið að skipa starfshóp til að gera tillögur að verklagsreglum um launalaus leyfi starfsmanna háskólans. Samkvæmt upplýsingum frá háskólanum hefðu reglurnar ekki verið samþykktar formlega af háskólaráði þegar umboðsmaður lauk athugun sinni á máli Ágústs. Af því tilefni minnti umboðsmaður á ofangreinda lagaskyldu og að þess yrði jafnframt gætt að birta reglurnar með aðgengilegum hætti.

Einnig kom fram í bréfi umboðsmanns til háskólarektors að ekki yrði séð af gögnum málsins að Ágúst hefði formlega verið tilkynnt af háskólanum um lok á starfssambandi hans og skólans en fram væri komið að hann hefði verið tekinn af launaskrá.

Ákvörðun í máli Ágústs Einarssonar