Verið er að leita leiða til að halda áfram, eins lengi og kostur er, fiskvinnslu hjá Fisk Seafood á Skagaströnd. Gígja Óskarsdóttir, trúnaðarmaður starfsfólks, segir að verið sé að kanna hve margir starfsmenn geti sótt vinnu til Sauðárkróks og hvernig hægt sé að halda uppi vinnu á Skagaströnd fyrir þá, sem ekki geta farið þaðan.

Gígja segir að frá því eftir sumarfrí hafi verið unnið úr afskurði af frystitogurunum Arnari og Málmey. Það hráefni sé af skornum skammti og dugi vart fyrir vinnu fyrir það fólk, sem nú starfi á Skagaströnd. Geti hluti starfsfólksins sótt vinnu til Sauðárkróks lengist sá tími sem þeir sem eftir verða hafa til að vinna úr afskurðinum, sem er saltaður.

Framkvæmdastjóri Fisk Seafood, Jón Eðvald Friðriksson, fundaði með fólkinu á Skagaströnd í gær. "Við fengum ekki endanleg svör þá um hvernig þeir ætla sér að leysa málið, þegar búið verður að vinna úr þessu hráefni. Það á eftir að koma í ljós," segir Gígja.