Í tilkynningu frá Mosfellsbæ segir, að atvinnuhúsasvæðið í Desjamýri afmarkist til norðurs af landi Lágafells, til vesturs af iðnaðarhverfi í Flugumýri og til suðurs af fyrirhugaðri, framlengdri Skarhólabraut undir Úlfarsfelli. Heildarstærð skipulagssvæðisins er um átta hektarar. Landið er með aflíðandi halla frá austri til vesturs og það liggur í um það bil 75 til 90 metra hæð yfir sjávarmáli.

Lóðunum verður einungis úthlutað til lögaðila og einstaklinga með rekstur. Við val á umsækjendum mun bæjarráð meðal annars horfa til hvort umsækjandi hyggist reisa iðnaðarhúsnæði til eigin þarfa. Þá verður lögð áhersla á að starfsemin hafi sem minnsta sjónræna mengun í för með sér. Einnig að fjöldi starfsmanna verði sem mestur. Enn fremur mun skipta máli við úthlutun hvort starfsemin sé líkleg til að auka á fjölbreytni í atvinnumálum innan bæjarfélagsins og að byggingartími sé sem stystur.

Megináhersla verður lögð á góða heildarmynd hverfisins sem mun liggja að íbúðarsvæði og útivistarsvæðum og að tengja það eldra iðnaðarhverfi þar sem lögð verður áhersla á fegrun umhverfisins. Leitast er við að nýta landkosti svæðisins sem best og að ásýnd byggðarinnar verði sem fallegust. Gerð er kvöð um notkun trjágróðurs og rík áhersla er lögð á vandaðan samræmdan lóðafrágang og hönnun.