Framkvæmdastjórn SGS og formenn aðildarfélaga sambandsins, annarra en flóafélaganna, komu saman til fundar í vikunni sem leið og gengu frá meginmarkmiðum samninganefndar SGS, þ.e. landsbyggðarfélaganna, vegna komandi kjaraviðræðna við Samtök atvinnulífsins.

Þetta segir í fréttatilkynningu sem birt hefur verið á vefsíðu Starfsgreinasambandsins.

Markmiðin verða kynnt SA þriðjudaginn 30. október nk., en reikna má með að viðræður aðila vegna komandi kjarasamninga hefjist fljótlega eftir það.

Viðræðunefnd valin

Formenn félaganna skipa samninganefnd sambandsins og á fundinum sem haldinn var fyrir skemmstu var einnig valin sérstök viðræðunefnd úr hópi formanna til að leiða viðræðurnar.

Kristján Gunnarsson formaður SGS verður formaður samninga- og viðræðunefndarinnar, auk þess sem Skúli Thoroddsen framkvæmdastjóri SGS mun starfa náið með nefndinni.

Flóafélögin, Efling, Hlíf og VSFK, hafa valið Sigurð Bessason formann Eflingar sem formann viðræðu- og samninganefndar flóafélaganna, en þau og landsbyggðarfélög SGS munu hafa með sér náið samhliða samstarf og samráð í viðræðunum við SA.

Samkvæmt viðræðuáætlun SGS við SA, er gert ráð fyrir að kröfugerð SGS verði fullmótuð um miðjan nóvember.