Stjórn Orkuveitu Reykjavíkur samþykkti samhljóða á fundi í dag að fallast á tilmæli borgarráðs Reykjavíkur um að hafna samruna Reykjavik Energy Invest (REI) og Geysis Green Energy (GGE). Þá samþykkti stjórnin að falla frá samþykki sínu, sem veitt var á stjórnar- og eigendafundi um einkaréttarsamning við REI og samruna REI við Geysi Green.

Var Bryndísi Hlöðversdóttur, stjórnarformanni OR, falið að ræða um stöðu og framhald málsins við aðra hluthafa í REI og aðra þá aðila er málið varðar. Er þar m.a. vísað til bréfs Hannesar Smárasonar, stjórnarformanns FL Group og GGE frá því í gær.

Í ályktun stjórnarinnar í dag segir að leitað verði viðeigandi leiða til að tryggja að tillaga borgarráðs nái fram að ganga.

Þá segir, að stjórn Orkuveitunnar samþykki, að fengnum tilmælum borgarráðs, að falla frá samþykki sínu sem veitt var 3. október á stjórnar- og eigendafundi OR að því er eftirfarandi atriði varði:

a) að OR kaupi nýtt hlutafé í REI að fjárhæð kr. 2.600.000.000, á genginu 1,0 sem staðgreiðist fyrir 1. febrúar 2008.
b) að Orkuveita Reykjavíkur samþykki að hlutir félagsins í Hitaveitu Suðurnesja hf., að bókfærðu verði kr. 8.674.611.-, verði lagðir inn sem hlutafé í REI á genginu 2,7 og fái hlutafé í REI að nafnvirði kr. 3.209.276 sem undanfari samruna REI og Geysis Green Energy.
c) að Orkuveita Reykjavíkur samþykki samning við REI um aðgang að tækniþjónustu o.fl., dags. 3. okt. sl.
d) að Orkuveita Reykjavíkur samþykki samruna REI við Geysi Green Energy hf. skv. fyrirliggjandi samningi um breytingar á eignarhaldi REI og samruna REI við Geysi Green Energy.

Áskilur stjórn OR sér rétt til að taka nýjar ákvarðanir varðandi ofangreind málefni, í samræmi við síðari ákvarðanir stjórnarinnar og væntanlegs eigendafundar OR, að fengnum tillögum stjórnarformanns OR.

Stjórn OR samþykkti einnig að beina því til stjórnarmanna í REI að ekki verði teknar neinar ákvarðanir í stjórn félagsins á grundvelli fundarsamþykktar frá 3. október sl., nema að fengnu fyrirfram samþykki stjórnar OR, en boðaður framhaldsaðalfundur REI verður haldinn 17 nóvember n.k.

Þá fól stjórn OR stjórnarformanni að vinna tillögur til stjórnar OR um aðgerðir sem nauðsynlegar eru til að ná þeim markmiðum sem að sé stefnt. Skuli þær tillögur lagðar fyrir næsta stjórnarfund OR. Stefnt er að því, áður en ákvarðanir eru teknar um einstakar aðgerðir, að bera slíkar tillögur undir aukafund eigenda í OR. Jafnframt er stjórnarformanni falið að hafa samráð við fulltrúa eigenda um það hvenær af slíkum fundi geti orðið.

Loks samþykkti stjórn OR að fyrirtækið kaupi nýtt hlutafé í REI að fjárhæð 2,6 milljarða króna á genginu 1. Er þetta gert til að tryggja hagsmuni OR gagnvart öðrum hluthöfum í REI.