Íslendingur er á meðal þeirra sem hafa orðið að flýja borgina Villahermosa í Mexíkó vegna flóða. Þórhildur Rán Torfadóttir hefur verið sem skiptinemi í borginni í um tvo mánuði. Faðir hennar, Torfi Friðfinnsson, sagðist í samtali við mbl.is hafa fengið upplýsingar um það að Þórhildur hafi verið flutt frá borginni í gær og að hún sé komin í öruggt skjól.

Hann hefur hinsvegar ekki heyrt í dóttur sinni frá því í fyrrakvöld, en símasamband hefur verið slæmt á flóðasvæðinu.

Torfi segir að hann og eiginkona hans hafi verið öllu rólegri eftir að þau fréttu í gegnum þriðja aðila að dóttir þeirra, sem 17 ára, hafi komist með flugi frá Villahermosa til Vera Cruz.

Gríðarlegt úrhelli hefur verið í borginni og segir Torfi að Þórhildur hafi ekki getað tjáð með orðum hve mikið hafi rignt í borginni. Þetta hafi í raun verið ólýsanlegt.

Að sögn Torfa var Þórhildur eini skiptineminn sem varð eftir í Villahermosa vegna þess að hún gleymdi vegabréfinu sínu þegar hún yfirgaf húsið sem hún gistir í. Þar af leiðandi hafi hún hvorki komist lönd né strönd. Hún hafi því þurft að koma sér upp á hæð sem er í miðri borginni þar sem hún beið ásamt þúsundum íbúa eftir því að komast í öruggt skjól. Torfi segist hafa síðast heyrt í dóttur sinni er hún beið á hæðinni. „Hún sagði að það hefði verið ótrúlegur fjöldi manns á tiltölulega litlu svæði,“ sagði Torfi.

Torfi segir að gert sé ráð fyrir því að Þórhildur fari aftur til Villahermosa á miðvikudaginn, en hann bætir því við að hann hafi ekki mikla trú á því að svo muni verða þar sem borgin væri öll á kafi. Rafmagnslaust er á svæðinu auk þess sem skortur er á vatni, mat og öðrum nauðsynjum.

Yfir 800.000 manns hafa misst heimili sín í Mexíkó af völdum flóðanna og eyðileggingin hefur verið gríðarleg.