Héraðsdómur Norðurlands eystra hefur dæmt karlmann í 150 þúsund króna sekt fyrir hafa þátt þátt í að smygla 32 lítrum af áfengi úr erlendu flutningaskipi sem var í Raufarhöfn. Maðurinn var sýknaður af ákæru fyrir að hafa s misnotað sér aðstöðu sína sem hafnarvörður og þannig gerst sekur um brot í opinberu starfi.

Fram kemur í dómnum, að lögreglumenn lágu í leyni við höfnina á Raufarhöfn í október og fylgdust með mannaferðum við flutningaskip, sem þar lá við bryggju. Sáu lögreglumennirnir úr fylgsni sínu hvar tveir menn óku að skipshlið, tóku við þremur pökkum í svörtum ruslapokum og óku síðan brott.

Lögregla tók síðar um nóttina skýrslu af öðrum manninum sem sagðist hafa farið ásamt hafnarverðinum og keypt 32 lítra af vodka af skipsmönnum, farið með það í áhaldahús sveitarfélagsins og gengið frá því í læstri geymslu. Vísaði maðurinn lögreglu á áfengið.

Báðir mennirnir báru fyrir dómi, að hafnarvörðurinn hefði ekki keypt áfengið fyrir sjálfan sig heldur farið með í áfengiskaupaferðina þar sem hinn maðurinn gat ekki talað við erlendu sjómennina vegna tungumálaerfiðleika.

Héraðsdómur segir, að ekki liggi annað fyrir en að hafnarvörðurinn hafi keypt áfengið í þágu hins mannsins. Það brot hafi hafnarvörðurinn framið utan venjulegs vinnutíma síns og ekki liggi fyrir að hann hafi verið við störf þegar hann keypti áfengið.