Höfuðstöðvar Orkuveitu Reykjavíkur. mbl.is/Rax

Í tilkynningu frá fyrirtækinu segir, að Bryndís Hlöðversdóttir, stjórnarformaður Orkuveitunnar, hafi umboð stjórnar til viðræðna við aðra hluthafa í REI og þá sem aðild áttu að samruna þess og Geysis Green Energy. Eigendur Orkuveitu Reykjavíkur eru Reykjavíkurborg, Akraneskaupstaður og Borgarbyggð. Haft er eftir Bryndísi, að tímabært sé að eigendur OR komi saman vegna útrásarverkefna fyrirtækisins.Orkuveita Reykjavíkur hefur frá árinu 1969 starfað með ýmsum aðilum að útflutningi þekkingar á nýtingu umhverfisvænna orkugjafa og á síðustu misserum hefur vaxandi meðvitund um loftslagsvandann samfara hækkandi olíuverði aukið mjög eftirspurn eftir þeirri þekkingu. Reykjavik Energy Invest, sem var stofnað með einróma ákvörðun stjórnar OR í mars sl., leitar slíkra sóknarfæra erlendis í samstarfi við einkaaðila og á nú þátt í útboði á eignarhlut filippseyska ríkisins í stærsta jarðorkufyrirtæki eyjanna. Þá starfar REI einnig að uppbyggingu jarðvarmavera í Djíbútí og fleiri Afríkuríkjum.

Gunnar Sigurðsson, fulltrúi Akraneskaupstaðar í stjórn OR, lét bóka eftirfarandi í tilefni umræðu um útrásarmál:

Miðvikudaginn 8. nóvember s.l. hafði Dagur B. Eggertsson borgarstjóri fund með starfsmönnum Orkuveitu Reykjavíkur og Reykjavík Energy Invest og sagði þar m.a. að stefnan væri sú að Orkuveitan yrði áfram í útrásinni og að alls ekki væri útilokað af hálfu aðaleiganda fyrirtækisins að af frekara samstarfi kynni að verða við Geysi Green Energy, líkt og nýleg ákvörðun um áframhaldandi verkefni á Filippseyjum sýndi, en þar vinna fyrirtækin saman sem og innan Enex. Undir þessa skoðun vil ég taka og tel jafnframt að stjórn og eigendur eigi að standa einhuga á bak við fyrirtækið og starfsfólk þess í þeim mikilvægu og vandasömu verkefnum sem Orkuveitan og starfsfólk þess vinnur fyrir eigendur sína.