Fjármálaráðherra hefur lagt fram frumvarp á Alþingi um að ráðuneytisstjórar, skrifstofustjórar í Stjórnarráði Íslands og forstöðumenn ríkisstofnana falli undir úrskurðarvald kjararáðs. Áður en lög um kjararáð tóku gildi tók kjaranefnd ákvörðun um laun þessara embætitsmanna en kjararáð hefur úrskurðað að þeir heyri ekki undir úrskurðarvald þess.

Fram kemur í greinargerð með frumvarpinu, að á því rúmlega eina ári, sem liðið er síðan lögin um kjararáð tóku gildi, hafi ráðið kveðið upp allnokkra úrskurði um hverjir falli undir ákvörðun kjararáðs. Af þeim sem féllu áður undir kjaranefnd og kjararáð hefur úrskurðað að falli ekki undir úrskurðarvald þess eru prófessorar, yfirdýralæknir, skrifstofustjórar í Stjórnarráði Íslands að frátöldum skrifstofustjóra starfsmannaskrifstofu fjármálaráðuneytisins, sendifulltrúar í utanríkisþjónustunni, forstöðumenn fangelsa og skrifstofustjóri á skrifstofu forseta Íslands.

Hvað varðar ný störf hefur kjararáð úrskurðað að aðstoðarlögreglustjórar lögreglunnar á höfuðborgarsvæðinu og aðstoðarríkislögreglustjórar falli ekki undir úrskurðarvald þess. Auk þess hefur kjararáð úrskurðað að framkvæmdastjóri Nýsköpunarsjóðs atvinnulífsins heyri ekki undir það þar sem stjórn sjóðsins ráði framkvæmdastjóra og í því felist einnig vald til að ráða launakjörum hans.

Í greinargerðinni segir að það hafi ekki verið fyrirséð við setningu laga um kjararáð, að hópar á borð við skrifstofustjóra í ráðuneytum falli ekki undir úrskurðarvald þess. Því sé nauðsynlegt að tilgreina frekar til hverra ákvæðið skuli ná með nánari upptalningu starfa sem eiga að falla undir úrskurðarvald kjararáðs.