Íslenski ferðamálageirinn hefur bætt úr ýmsum misfellum eftir tilmæli talsmanns neytenda en víða erlendis er enn brotið gegn flugfarþegum og er birting á nöfnum fyrirtækja eitt úrræðið. Kannað verður hvort eitthvað stendur út af gagnvart neytendum hérlendis, segir í frétt á vef talsmanns neytenda.

Undanfarið hefur verið fjallað um það í alþjóðlegum fjölmiðlum og víðar að rannsókn evrópskra neytendayfirvalda hafi leitt í ljós misfellur gagnvart neytendum af hálfu ferðamálageirans. Flugfélög og ferðaskrifstofur á Íslandi hafa fært mál sín til betri vegar í kjölfar tilmæla talsmanns neytenda - en brugðist verður við ábendingum um að enn séu misfellur hvað varðar nafngiftir kostnaðarliða.

Talsmaður neytenda brást fyrr á árinu við villandi nafngiftum á aukakostnaði flugfarþega og svonefndri neikvæðri samningsgerð. Í kjölfar þess að íslensk flugfélög brugðust við formlegum tilmælum frá talsmanni neytenda varðandi þetta beindi hann óformlegum tilmælum til ferðaskrifstofa og hafa fulltrúar þeirra allra nú upplýst talsmann neytenda um að ekki sé lengur gert ráð fyrir að þögn sé sama og samþykki, t.d. hvað varðar forfallagjald eða aðra aukaþjónustu.

Er þess nú vænst að neikvæð samningsgerð og villandi upplýsingar séu úr sögunni gagnvart íslenskum neytendum á þessu sviði en lýst er eftir dæmum um annað - á þessu sviði eða öðru - enda hefur talsmaður neytenda ekki haft tök á að fara yfir allar heimasíður sem koma við sögu.

Frétt talsmanns neytenda