Bryndís Hlöðversdóttir, stjórnarformaður Orkuveitu Reykjavíkur, segir að rætt hafi verið um á síðasta stjórnarfundi OR að boða næsta fund um leið og tilefni gæfist til og að nú sé unnið að því að finna dagsetningu sem henti, sem verði væntanlega á næstu dögum. Segist Bryndís gera ráð fyrir því að fundurinn verði boðaður síðar í dag.

Júlíus Vífill Ingvarsson og Kjartan Magnússon, fulltrúar Sjálfstæðisflokks í stjórn OR, sendu Bryndísi í dag bréf þar sem farið var fram á að stjórnarfundur yrði haldinn hið fyrsta, jafnvel í dag eða um komandi helgi.

Til stóð að halda stjórnar- og eigendafund í orkuveitunni í dag, en þeim fundi var svo frestað um viku. Júlíus Vífill sagði í samtali við mbl.is fyrr í dag að æði langt væri orðið síðan stjórnarformanni var falið að ræða við hagsmunaaðila um stöðu og framhald mála Reykjavík Energy Invest en engar upplýsingar hefðu verið lagðar fram um það hvernig þær viðræður hefðu gengið.