Hjalti Þór Vignisson, bæjarstjóri á Höfn í Hornafirði, segir það alltaf áhyggjuefni þegar fréttir berist af hugsanlegum olíuleka en að samkvæmt  sínum upplýsingum hafi ekki orðið umtalsverður olíuleki er flutningaskipið Axel steytti á skeri við innsiglinguna til Hafnar í Hornafirði um klukkan átta í morgun.<p>

 „Það er ljóst að það hefur orðið einhver leki þarna en hann virðist ekki hafa verið umtalsverður," sagði Hjalti Þór er blaðamaður mbl.is ræddi við hann í morgun. „Það liggur heldur ekki enn ljóst fyrir hversu mikla skemmdir urðu á skipinu en það er verið að kanna þetta allt saman." Þá sagði hann að björgunarmenn á staðnum vera búnir að ná utan um ástandið en fram kemur í fréttatilkynningu frá Landhelgisgæslu Íslands og Slysavarnafélaginu Landsbjörgeru að verið sé að koma fyrir olíugirðingu til að hefta hugsanlega olíumengun frá skipinu.

Skipið var að koma frá Höfn er það steytti á skeri við Borgeyjarboða. Skipverjum tókst að losa það af skerinu en ekki tókst að koma vélum þess aftur í gang og þótti ekki ráðlegt að reyna að draga það aftur inn fyrir innsiglinguna til Hafnar vegna útfalls, þar sem hætta var talin á að það lokaði innsiglingunni festist það þar og vegna hugsanlegrar hættu á olíumengun.

Axel er 2500 tonna frystiskip, byggt árið 1989. Skráður eigandi þess er Dregg ehf en skipið er skráð á eyjunni Mön. Skipstjóri Axels er íslenskur en aðrir í áhöfn eru frá A-Evrópuþjóðum.