Landsvirkjun hefur gefið út skuldabréf að fjárhæð 75 milljónir dala,  jafnvirði 4,5 milljarða króna, undir svonefndum EMTN rammasamningi fyrirtækisins. Segir fyrirtækið að um sé að ræða mjög hagstæð kjör þrátt fyrir óhagstæð ytri skilyrði á mörkuðum.

Lánstíminn er 7 ár og eru kjör skuldabréfsins Libor + 0,07%. Umsjónaraðilar útgáfunnar er belgíski bankinn DEXIA. Með þessari útgáfu er fjármögnun ársins 2007 lokið.

Landsvirkjun segir, að aðstæður á lánamörkuðum hafi verið Landsvirkjun hagstæðar á fyrri hluta ársins sem skilaði sér í hagstæðum lánum bæði hvað varðar kjör og lánstíma. Fyrirtækið náði að ljúka stærstum hluta lánsfjárþarfar sinnar vegna ársins í maí sl. Munaði þar mestu um mikið framboð fjármagns á mörkuðum og góða lánshæfiseinkunn fyrirtækisins.

Frá því í ágúst,  þegar áhrifa af bandarísku húsnæðislánakrísunni fór að gæta, hafi aðstæður á lánamörkuðum verið óhagstæðar. Fjármálafyrirtæki hafa þurft að afskrifa töluverðar fjárhæðir og erfiðleikar í bandaríska hagkerfinu hafa teygt anga sína yfir á aðra markaði. Í kjölfarið hefur mikil áhættufælni ríkt á mörkuðum og margir hafa haldið að sér höndum. Til að gera ástandið enn erfiðara á lánamörkuðum fyrir íslensk fyrirtæki tilkynnti erlenda lánshæfisfyrirtækið Standard & Poor´s í sl. viku að horfur íslenska ríkisins hefðu verið færðar úr stöðugum niður í neikvæðar.

Landsvirkjun segir, að breytingar sem þessar hafi bein áhrif á lánshæfiseinkunn Landsvirkjunar til hins verra. Þrátt fyrir þessi óhagstæðu ytri skilyrði hafi Landsvirkjun tekist að gefa út skuldabréf á mjög hagstæðum kjörum á sama tíma og tryggingarálag á íslenska ríkið var um Libor + 0,4%.

Fyrir utan hefðbundna fjármögnun hefur Landsvirkjun aðgang að veltiláni að upphæð 400 milljónir dala, sem tekið var í árslok 2005 og er ætlað að styðja enn frekar við lausafjárstöðu fyrirtækisins. Heildarfjárþörf fyrirtækisins fyrir árið 2008 er um 600 milljónir dala og segir í tilkynningunni, að Landsvirkjun fari því inn í næsta ár fjárhagslega sterkt og með töluvert lausafé til ráðstöfunar.