mbl.is/Ingólfur

Eftir Guðna Einarsson

Rjúpnaveiðin var almennt dræm á nýliðnu rjúpnaveiðitímabili, en því lauk í gær. Leyfðar voru veiðar í 18 daga í nóvember en bannað var að veiða frá mánudegi til miðvikudags í viku hverri.

Náttúrufræðistofnun Íslands hvetur rjúpnaveiðimenn til að skila þangað vængjum af veiddum rjúpum í þágu rannsókna. Undir lok veiðitímans höfðu fáir vængir skilað sér.

Áki Ármann Jónsson, forstöðumaður veiðistjórnunarsviðs Umhverfisstofnunar (UST), sagði að sér sýndist rjúpnaveiðin hafa verið treg og heldur minni en í fyrra. Það markaði hann af færslum í rafræna veiðidagbók UST og eins af orðum veiðimanna.

Þetta er þriðja árið sem rjúpnaveiðimönnum býðst að færa veiði sína í rafrænu veiðidagbókina. Áki sagði færslurnar sýna að laugardagar væru tvöfalt vinsælli til veiða en sunnudagar og svo hefði verið öll árin.

Bann við sölu á rjúpum og rjúpnaafurðum hefur skilað ótrúlega góðum árangri, að mati Áka. Hann sagði að á skilavef veiðiskýrslna byðist skotveiðimönnum að taka þátt í skoðanakönnun. Eftir síðasta veiðiár bauðst mönnum að merkja við hvort þeir neyttu sjálfir rjúpna sem þeir veiddu, gáfu þær eða seldu. Menn sem veiddu samtals um 42 þúsund rjúpur árið 2006 svöruðu könnuninni. Þar af höfðu um 33.500 rjúpur farið til eigin neyslu veiði manna, um 7.800 rjúpur höfðu verið gefnar en aðeins 726 rjúpur verið seldar.

Ólafur Karl Nielsen, fuglafræðingur og rjúpnasérfræðingur hjá Náttúrufræðistofnun Íslands, sagði að almennt hefði rjúpnaveiðin verið mjög treg í haust. Menn segðu sömu sögu hringinn í kringum landið, þeir hefðu séð mjög lítið af rjúpu og náð fáum.

Ólafur taldi þetta að einhverju leyti helgast af því að veiðar byrjuðu seinna nú en venjulega. Dagur orðinn styttri og búið að snjóa í fjöll þegar veiðin hæfist. Því var viðbúið að fuglinn væri eitthvað dreifðari. Einnig hefði viðrað illa til veiða suma daga sem veiðar voru leyfðar.