Samtök atvinnulífsins á Norðurlöndunum sendu í dag bréf til forsætisráðherra Norðurlanda og umhverfisráðherra auk forseta framkvæmdastjórnar Evrópusambandsins þar sem hvatt er til þess að stjórnvöld og atvinnulíf vinni saman að því að finna lausnir á loftslagsvandanum.

Í bréfinu kemur fram að samtök atvinnulífsins á Norðurlöndum ræði nú af fullum þunga um leiðir til að vinna gegn þeim loftslagsbreytingum sem eru að eiga sér stað. Samtökin hafi jafnframt tekið saman tillögur um hvernig hægt sé að ráðast gegn vandanum en það sé mat þeirra að án aðkomu atvinnulífsins verði vandinn ekki leystur.

Þá feli tillögurnar í sér sýn um nýtt alþjóðlegt samkomulag eftir að Kyoto-bókunin fellur úr gildi árið 2012 og undirstriki með hvaða hætti Evrópusambandið geti unnið gegn óæskilegum áhrifum loftslagsbreytinga með raunhæfum og hagkvæmum aðgerðum.

Samtökin segjast binda miklar vonir við að loftslagsráðstefna aðildarríkja loftslagssamnings Sameinuðu þjóðanna, sem nú stendur yfir á Bali, muni leiða til alþjóðlegs samkomulags ekki síðar en í árslok 2009. Eigi slíkt samkomulag að skila árangri verði þær þjóðir, sem ábyrgar eru fyrir mestum útblæstri gróðurhúsalofttegunda á heimsvísu, að eiga aðild að því.

Þetta þýði í raun, að ríki OECD verði að setja sér sambærileg markmið og Evrópusambandið hafi sett sér að ná fyrir árið 2020, þó þannig að tekið verði tillit til sérstöðu einstakra ríkja. Jafnframt verði þau að tryggja að útstreymi gróðurhúsalofttegunda frá þróunarríkjum verði takmarkað og að þeim verði gert að ná tilteknum árangri innan ákveðins tíma.