Veggurinn sem var reistur til að fela brunarústir húsanna á horni Lækjargötu og Austurstrætis hefur heldur betur látið á sjá undanfarnar vikur og óhætt að segja að hann sé orðinn til vansa fyrir borgina. Til stendur að skipta um klæðningu á veggnum og er vonast til að því ljúki fyrir helgi.

„Haustrigningarnar fóru með myndina, illu heilli,“ sagði Þorsteinn Bergsson, framkvæmdastjóri Minjaverndar, sem hefur verið borginni innan handar varðandi ýmislegt sem varðar húsin og vegginn sem hlífir þeim. Minjavernd ber þó ekki ábyrgð á verkinu, að sögn Þorsteins.

Myndirnar voru á dúk sem var límdur við krossviðarplötur en í slagviðrinu í haust gaf sú líming sig og smám saman kvarnaðist úr dúknum. Að sögn Þorsteins höfðu veggurinn og myndirnar fengið að vera í friði fyrir skemmdarvörgum, allt þar til skemmdir fóru að sjást á veggnum. Eftir það leið skammur tími þar til fyrstu veggspjöldin höfðu verið límd á vegginn. „Með það sama var búið að betrekkja með þeim ófögnuði,“ sagði Þorsteinn.

Aðspurður sagði Þorsteinn að engin leyfi hefðu verið veitt fyrir því að veggspjöld yrðu límd þarna upp. Þar með er ljóst að þeir sem límdu spjöldin upp brutu gegn lögreglusamþykkt Reykjavíkurborgar því þar stendur m.a. að á mannvirki og hluti megi „ekki mála, teikna eða festa auglýsingar, nema með leyfi eiganda eða umráðamanns“. Góð auglýsing það.