Eru þríburafæðingar paranna tilviljun ein?
Frjósemisgoðið öfluga.
Eftir Jóhönnu Maríu Vilhelmsdóttur jmv@mbl.is
Frjósemisgoð frá Dóminíska lýðveldinu er grunað um að vera valt að einstakri frjósemi tveggja ungra íslenskra para. Vúdúgaldrar tengjast menningu landsins töluvert, en þeir eru upprunnir á Haítí, sem á landamæri að Dóminíska lýðveldinu.
Árið 2003 voru Ása Einarsdóttir og Birgir Már Guðbrandsson þar í sumarfríi og keyptu frjósemisgoð af sölumanni sem staðfesti virkni þess.
„Þetta var á útimarkaði, hann átti sjálfur 10 börn og fullvissaði þau um að þetta myndi svínvirka,“ segir Níní Jónsdóttir, en Ása og Birgir gáfu henni og manni hennar, Kristni Erni Sverrissyni, goðið upp á grín, þar sem þau vissu að þau stefndu á barneignir. Þá var Níní reyndar þegar orðin ófrísk að fyrsta barni þeirra hjóna.
Árið 2005 fór Níní í frjósemismeðferð til að eignast fleiri börn, og í maí ári seinna eignuðust þau þríbura. Börnin eru öll heilbrigð, allt gekk mjög vel og hjónin tengdu frjósemisgoðið svo sem ekki endilega við barnagæfuna á þessu stigi málsins, þar sem fleirburar eru ekki óalgengir þegar um frjósemismeðferðir er að ræða.
Goðinu skilað við góðan árangur
Þau ákváðu samt til öryggis að skila goðinu til Birgis og Ásu, enda þótti þeim nóg komið.„Maðurinn minn hélt ræðu í brúðkaupinu þeirra, afhenti Birgi goðið og sagði að við værum búin að eignast fjögur börn á tveimur og hálfu ári og nú væri komið að þeim,“ segir Níní.
Ekki var að spyrja að afleiðingunum, því Ása var orðin ófrísk að þríburum mánuði seinna, á eðlilegan hátt og án frjósemislyfja.
„Þetta var náttúrlega nett áfall, maður býst ekki við að fá þríbura í fyrstu tilraun, en við þökkuðum Kidda og Níní bara pent fyrir gjöfina,“ segir Ása og hlær, enda hæstánægð með barnalánið. Hún á von á þríburunum hinn 19. desember næstkomandi. Foreldrunum frjósömu þykir þetta allt mjög ótrúlegt og ekki laust við að þau trúi orðum sölumannsins barnmarga, sem ef til vill hefur notað vúdúgaldra til að auka virkni goðsins.
Birgir og Ása eru nú að reyna að koma goðinu góða frá sér með öllum ráðum. „Við ætlum að reyna að afhenda goðið við aðstæður þar sem fólk getur ekki neitað að taka við því, ætli næsta barnlausa par sem býður okkur í brúðkaupið sitt fái það ekki bara,“ segir Ása, sem segir jafnframt að ættingjar og vinir séu logandi hræddir um að fá goðið í jólapakkann í ár.
