„Í fljótu bragði er hér um mjög jákvætt skref að ræða og framfaraspor,“ segir Sigursteinn Másson, formaður Öryrkjabandalags Íslands (ÖBÍ) um aðgerðir ríkisstjórnarinnar til að bæta kjör aldraðra og öryrkja og kynntar voru í gær. Vísar Sigursteinn sérstaklega til afnáms skerðingar vegna tekna maka.

Sigursteinn fagnar einnig breytingunni sem gera eigi á frítekjumarkinu, en í yfirlýsingu ríkisstjórnarinnar kemur fram að hún nái til atvinnutekna ellilífeyrisþega á aldrinum 67–70 ára. Í samtali við Morgunblaðið segist Sigursteinn vænta þess að sambærilegt frítekjumark verði útfært fyrir öryrkja líka og vísar þar til þess að ekki sé hægt að skilja tillögur ráðgjafahóps félagsmálaráðherra um almannatryggingar öðruvísi en svo að finna eigi leiðir sem gilda eigi jafnt um aldraða og öryrkja.

Að sögn Sigursteins hefði hann vilja sjá sumar aðgerðirnar koma til framkvæmda fyrr á árinu 2008. „En á svona degi verður maður að gleðjast yfir því sem náðst hefur. Hins vegar á varðandi öryrkja eftir að útfæra ákveðna mikilvæga þætti og því er of snemmt að fagna mikið. Vonandi hef ég ástæðu til að gera það í sumar,“ segir Sigursteinn.

Leysir ekki allan vandann

Reynir Ingibjartsson, formaður AFA, aðstandendafélags aldraðra sagði í samtali við Morgunblaðið í gærkvöldi að málið væri nýtilkomið og félagið ekki í aðstöðu til að bregðast við að svo komnu máli. Félagið myndi fara yfir málið og tjá sig um það á blaðamannafundi sem það hefur boðað í dag.

AFA stendur ásamt öðrum hagsmunasamtökum aldraðra fyrir blaðamannafundi í dag þar sem ræða á lokaafgreiðslu fjárlaga fyrir árið 2008 og brýna þörf á auknu fjármagni vegna búsetu- og kjaramála aldraðra.

Reynir bendir á að þótt sér lítist ekki alls illa á aðgerðir þær sem ríkisstjórnin kynnti í gær í málefnum aldraðra þá sé langt frá því að þær leysi allan vandann í málaflokknum.