Héraðsdómur Reykjavíkur hefur dæmt 25 ára gamlan karlmann í 18 mánaða fangelsi fyrir kynferðisbrot gegn stúlku, sem var 14 ára þegar brotið var framið. Maðurinn var einnig dæmdur til að greiða stúlkunni 900 þúsund krónur í bætur.

Maðurinn var ákærður fyrir að hafa þröngvað stúlkunni til samræðis í bíl, sem lagt var við skóla í Reykjavík sumarið 2005. Héraðsdómur dæmdi fyrst í málinu í nóvember á síðasta ári og sýknaði manninn en Hæstiréttur ómerkti dóminn og vísaði málinu aftur heim í hérað.

Maðurinn neitaði sök og sagðist ekki þekkja stúlkuna en dómurinn taldi þann framburð ótrúverðugan í ljósi framburða vitna. Þá taldi dómurinn að framburður stúlkunnar væri trúverðugur að því leyti, að sannað væri að maðurinn og stúlkan hefðu  haft mök inni í bílnum umrætt sinn.

Fram hjá því yrði hins vegar ekki litið að framburður stúlkunnar um mökin sjálf hafi oft verið mótsagnakenndur og ónákvæmur og of óljós til að hægt sé að byggja á því, að maðurinn hafi þvingað hana  til samræðis með ofbeldi eða hótun um ofbeldi. Dómurinn taldi hins vegar ljóst að mökin hefðu verið gegn vilja stúlkunnar og maðurinn hefði beitt hana ólögmætri nauðung í ljósi aldurs-, þroska, -og aflsmunar.

Í dómnum kemur m.a. fram , að stúlkunni hefði liðið mjög illa eftir atburðinn, hún hefði misst einbeitingu í námi og liði enn mjög illa.

Þá kemur einnig fram, að maðurinn hefur tvívegis hlotið fangelsisdóma fyrir alvarlegar líkamsárásir auk fleiri brota.