Litlu mátti muna að eggvopn sem árásarmaður beitti gegn Rögnvaldi Ólafssyni leigubílstjóra í fyrrakvöld, í misheppnaðri ránstilraun, færi í auga Rögnvaldar. „Hann sat fyrir aftan mig og svo kom allt í einu hnefinn á loft. Ég sá að það blikaði á eitthvað og það stefndi bara beint á augað,“ sagði Rögnvaldur í samtali við Morgunblaðið í gær.

Árásarmaðurinn, sem Rögnvaldur hafði tekið upp í Kringlunni og keyrt að Hátúni, hafði nokkru áður vikið út úr bílnum, að sögn til að ná í peninga fyrir farinu. Rögnvaldur telur hins vegar víst að hann hafi einungis verið að ganga úr skugga um að enginn yrði vitni að ráninu. Að sögn Rögnvaldar hafði farþeginn virst í fullkomnu jafnvægi fram að þessu og því kom það fullkomlega á óvart þegar hann heimtaði peninga. Rögnvaldur neitaði og án nokkurs hiks lagði árásarmaðurinn til hans með hnífi.

Með naumindum tókst Rögnvaldi að beygja sig fram þannig að lagið kom fyrir ofan hægri augabrún en við það opnaðist skurður og blóð fossaði út þannig að hann sá lítið sem ekkert með auganu. Við tóku snörp átök, „glíma upp á líf og dauða,“ eins og Rögnvaldur lýsir þeim. Þegar hnífslagið dugði ekki til lét árásarmaðurinn höggin dynja á Rögnvaldi sem varði sig eftir mætti en átti óhægt um vik þar sem hann var í bílbelti. „Þegar ég var búinn að losa það reif ég upp hurðina. Og þá hljóp hann, þá var kjarkurinn búinn.“

Rögnvaldur hefur ekið leigubíl í 22 ár og að hans mati hefur ástandið snarversnað. Áður hafi sumir verið „fullir og leiðinlegir“ en nú séu alltof margir á efnum sem geri þá upptendraða og hættulega. Þetta hafi hvorki verið fyrsta né síðasta árásin á leigubílstjóra og þeir hljóti að hugsa um hvort rétt sé að koma fyrir e.k. öryggisbúnaði, s.s. gleri milli ökumannssætis og farþega til að koma í veg fyrir árásir.