Landspítali og Slökkvilið höfuðborgarsvæðisins segja í sameiginlegri yfirlýsingu, að kröftum lækna í framhaldsnámi á slysa- og bráðasviði Landspítala verði frá og með 15. janúar beint að því að efla bráðaþjónustuna innan spítalans enn frekar í stað þess að ganga vaktir á neyðarbíl slökkviliðsins.

Segir í yfirlýsingunni, að mikil fjölgun háskólamenntaðra bráðatækna hjá SHS hafi gert þessa breytingu mögulega án þess að bráðaþjónustan utan spítalans skerðist. Í tengslum við breytinguna muni Landspítali og SHS leitast við að styrkja samstarf sitt enn frekar til að tryggja gæði bráðaþjónustunnar á vettvangi slysa og bráðra veikinda.

„Skipulagsbreytingin er gerð með vitneskju og eftir atvikum samráði þeirra sem best þekkja til bráðaþjónustu innan og utan stofnana, landlækni, Sjúkraflutningaskólans, SHS og sérfræðinga spítalans. Tugir þúsunda leita árlega til bráðamóttökunnar og er von slysa- og bráðasviðs Landspítala sú að með þessu móti verði unnt að koma betur til móts við þarfir þeirra. Störf lækna sem koma á slysa- og bráðasviðið til framhaldsnáms og þjálfunar eru bráðaþjónustunni innan Landspítala afar mikilvæg.

Fjarvera þeirra vegna reglulegra vakta á sjúkrabílum hefur óneitanlega valdið auknu álagi á annað starfsfólk í bráðaþjónustu spítalans en þeim fjölgar sífellt sem þurfa á þjónustunni að halda.

Bráðatæknar hjá SHS hljóta menntun sína í Bandaríkjunum þar sem hefð er fyrir því, eins og víðar, að bráðatæknar annist bráðaþjónustu utan stofnana. Mikil áhersla er hins vegar lögð á samskipti viðbragðsaðila á vettvangi og sérfræðinga á slysadeild á meðan verið er að koma sjúklingi undir læknishendur og hyggjast Landspítali og SHS styrkja þann þátt í samstarfi sínu. Enn fremur verður samstarf aðila um gæðaeftirlit og símenntun sjúkraflutningamanna eflt enn frekar. Þátttaka í störfum á vettvangi við hlið sjúkraflutningamanna verður eftir sem áður hluti af þjálfun lækna í framhaldsnámi í bráðalækningum," segir í yfirlýsingunni.