Tengivagnar fuku um koll á Ísafirði í óveðrinu í nótt. mynd/bb.is

Lítil skúta fauk í óveðrinu í nótt. Skútan var á kerru á uppsátrunum í Sundahöfn á Ísafirði. Í morgun þegar gætt var að bátnum sáust hvorki tengur né tetur af henni en síðan hefur kjölur hennar fundist. Víðtæk leit hefur verið að skútunni eða braki úr henni en ekkert fundist nema kjölurinn.

Guðmundur M. Kristjánsson hafnarstjóri segir að bátar sem eru bundnir við bryggju hafi ekkert hreyfst í óveðrinu en hann beinir til þeirra sem eiga báta á uppsátrum Ísafjarðarhafnar að ganga betur frá þeim. Rafmagnstruflanir voru í víða á Vestfjörðum í nótt.

Hjá Orkubúi Vestfjarða fengust þær upplýsingar að lína Landsnet til Vestfjarða út kl 1:40 í nótt. Í dreifikerfi Orkubúsins eru allar línur inni nema Súðavíkurlínan. Rafmagn er framleitt með dísilvélum á Ísafirði og Bolungarík, Patreksfirði og Súðavík.

Nær allar björgunarsveitir á norðanverðum Vestfjörðum voru kallaðar út vegna veðurofsans í nótt og í morgun. Klukkan 6:30 var Björgunarfélag Ísafjarðar kallað út og björgunarsveitin Tindar stuttu seinna, báðar vegna foks á lausamunum, aftanívögnum og kerrum.

Björgunarsveitin Ernir í Bolungarvík, Sæbjörg á Flateyri og björgunarsveitin á Þingeyri voru kallaðar út á svipuðum tíma þegar þakplötur og annað fór að fjúka. Að sögn Haraldar Júlíussonar formanns Björgunarfélags Ísafjarðar fuku þakplötur af húsnæði félagsins, Guðmundarbúð, og er ljóst að um töluvert tjón er að ræða.

Búist er við að það lægi er líða tekur á daginn en vindur taki sig upp á ný með kvöldinu og eru björgunarsveitir undir það búnar.

Bæjarins besta