Netverslun með íslenskar matvörur, drykkjarvörur, sápur og sælgæti er tekin til starfa í Danmörku. Segir eigandi verslunarinnar að malt og appelsín sé vinsælast. Þar á eftir kemur íslenskt vatn, súkkulaði, konfekt og sælgæti í lausu. Vefslóð verslunarinnar er www.bestoficeland.dk.

Kaupmaðurinn, Sigurjón Páll Jónsson, er tæplega þrítugur og flutti ásamt fjölskyldu sinni til Danmerkur 1995. Hann lærði rennismíði og vinnur nú við smíði vindorkuvéla hjá Vestas. Hugmyndin um verslun með íslenskar vörur gerjaðist með honum í sjö ár og fyrir tæpum þremur vikum opnaði hann vefverslunina.

Búðin býður nú til sölu jólahangikjöt frá Norðlenska. Einnig er á boðstólum m.a. íslensk Egils síld og ORA síld, Eyjabita harðfiskur, ORA fiskibollur og grænar baunir, kaldar sósur frá Gunnars, kaffi frá Kaffitári, íslenskt Glacial H2O vatn, Undra sápur, sælgæti frá Góu-Lindu og Nóa Síríusi, malt og appelsín, Víking bjór, Egils Gull og íslenskt brennivín.

Sigurjón sagði yfirleitt litlum vandkvæðum bundið að flytja þessar vörur til Danmerkur, undantekningar frá því eru íslenskt brennivín og unnar kjötvörur. Þar eð Ísland er ekki í Evrópusambandinu er þröskuldurinn hár fyrir sterka áfengið og hömlur við unnum kjötvörum.

„Malt og appelsín er vinsælast,“ sagði Sigurjón. Þar á eftir kemur íslenskt vatn, súkkulaði, konfekt og sælgæti í lausu. M.a. hafa Íslendingafélög í Danmörku keypt sælgæti til að gefa börnum „bland í poka“.

Sigurjón sagði að verslunin hefði tekið vel við sér, æ fleiri skrái sig á síðuna. Flestir viðskiptavina eru Íslendingar en Danir hafa einnig keypt íslensku vörurnar. Sigurjón sagði að Íslendingar í Danmörku skiptu mörgum þúsundum og væru vænlegasti kaupendahópurinn, en Dönum þættu vörurnar líka góðar. Þá gæti fólk sent vinum í Danmörku glaðning í gegnum verslunina.

www.bestoficeland.dk.