Alþingi samþykkti stuttu fyrir þinglok breytingartillögu meirihluta fjárlaganefndar við fjárlögin þess efnis að gengið verði til samninga við Reykjavíkurborg um lóð undir samgöngumiðstöð sem fyrirhugað er að reisa við Reykjavíkurflugvöll.

Að sögn Gunnars Svavarssonar, þingmanns Samfylkingarinnar og formanns fjárlaganefndar, er hér um svonefnda 6. greinar heimildargrein að ræða, sem heimilar fjármálaráðherra að ganga til samninga við Reykjavíkurborg um lóð undir samgöngumiðstöð í Vatnsmýri á árinu 2008. Ekki felast í greininni nein fjárhagsleg viðmið, en að sögn Gunnars munu viðræður milli fjármálaráðuneytisins og Reykjavíkurborgar væntanlega leiða í ljós hvaða tölur sé um að ræða.

Að sögn Þórhalls Arasonar, skrifstofustjóra fjárreiðu- og eignaskrifstofu í fjármálaráðuneytinu, eru samningaviðræður við Reykjavíkurborg ekki enn hafnar, þar sem fjármálaráðuneytið bíður sem stendur eftir nánari upplýsingum frá samgönguráðuneytinu um málið. Spurður hvenær stefnt sé að því að samningum verði lokið segir Þórhallur ekki hægt að svara því á þessu stigi.

Samgöngumiðstöðin norðan við Hótel Loftleiðir

Samkvæmt upplýsingum frá Flugstoðum er áætlað að samgöngumiðstöðin muni rísa á svæði sem er norðan við Hótel Loftleiðir og sunnan við Hringbraut, gegnt gatnamótum við Læknagarð og BSÍ. Í viðræðum milli Reykjavíkurborgar og samgönguyfirvalda mun nákvæm staðsetning og stærð lóðarinnar skýrast. Eftir því sem blaðamaður kemst næst er áætlað að samgöngumiðstöðin útheimti 49 þúsund fermetra umráðasvæði, þar af yrði lóð hugsanlega 25 þúsund fermetrar og húsið um 8 þúsund fermetrar á tveimur hæðum og með stórum bílakjallara.

Miðað er við að opnun samgöngumiðstöðvarinnar gæti orðið um mitt ár 2009, en það er háð því að framkvæmdir geti hafist fljótlega á nýju ári, þ.e. á fyrsta fjórðungi ársins 2008. Þetta var meðal þess sem fram kom í skriflegu svari Kristjáns L. Möller samgönguráðherra, við fyrirspurn Þuríðar Backmann þingkonu Vinstri grænna á Alþingi 13. desember sl. Í sama svari kom fram að fyrsta áfanga í undirbúningsvinnu vegna byggingar samgöngumiðstöðvarinnar sé þegar lokið og að niðurstöður hans séu til umfjöllunar.

Hönnunin taki mið af því að flugvöllurinn geti farið

Samkvæmt upplýsingum úr samgönguráðuneytinu er gert ráð fyrir að samgöngumiðstöðin muni þjóna flugrekendum og flugfarþegum í áætlunar- og leiguflugi og vera miðstöð langferðabifreiða, auk þess að tengjast almenningssamgöngum á höfuðborgarsvæðinu. Þá er gert ráð fyrir margháttaðri verslunar- og veitingaþjónustu, auk bankastarfsemi og skrifstofuhúsnæðis. Í fyrrgreindu svari ráðherra kemur fram að hönnun miðstöðvarinnar miðist við að þar rúmist annars konar starfsemi ef til þess komi að flugvöllurinn fari úr Vatnsmýrinni.