Sigursteinn Másson og Hafdís Gísladóttir á blaðamannafundi í gær. mbl.is/Golli

Emil Thoroddsen, varaformaður Öryrkjabandalagsins, vildi í gærkvöldi lítið tjá sig um afsögn Sigursteins Mássonar, formanns bandalagsins, í gær en sagðist sleginn yfir afsögn Sigursteins. „Við erum að skoða málin,“ sagði hann.

„Framkvæmdastjórnin ákvað að hittast aftur í næstu viku og á meðan erum við ekki með neinar yfirlýsingar. Þetta [afsögnin] kom það flatt upp á okkur. Í rauninni var þetta óvænt og við vorum slegin. Nú þurfum við að endurskipuleggja okkur.“

Sigursteinn sagðist gera ráð fyrir að Emil tæki við formennsku í ÖBÍ, sem varaformaður, en Emil tók einnig sæti í stjórn Hússjóðsins ÖBÍ í fyrradag. Slíka samblöndun segir Sigursteinn ekki hafa gefist vel.

Hafdís Gísladóttir sagði einnig upp störfum í gær sem framkvæmdastjóri ÖBÍ. Hún sagði aðspurð að hún segði einnig af sér því hún hefði komið inn í starf framkvæmdastjóra með Sigursteini, miðað við þær forsendur, hugmyndafræði og verkefni sem hann byggði á. ,,Þess vegna tel ég að ef hann fari þá fari ég líka,“ sagði Hafdís. 

Ástæða þess að formaður og framkvæmdastjóri hætta er að á aðalstjórnarfundi var tillögu meirihluta framkvæmdastjórnar um skipan nýrrar stjórnar Hússjóðs ÖBÍ hafnað. Sigursteinn sagði augljóst að ofuráhersla hafi verið lögð á að sama stjórn sæti áfram. Sú stjórn hefur setið í um það bil tíu ár.