Eftir Örlyg Stein Sigurjónsson orsi@mbl.is

Ágreinigur skattrannsóknarstjóra og ríkislögreglustjóra um afhendingu gagna vegna rannsóknar á meintum skattalagabrotum Óskars Magnússonar, fyrrverandi stjórnarformanns Baugs Groups, hefur að líkindum náð hámarki hinn 10. janúar sl. þegar ríkislögreglustjóri fékk í Héraðsdómi Reykjavíkur samþykktar kröfur sínar um húsleit hjá skattrannsóknarstjóra.

Úrskurðarorð héraðsdóms er á þá leið að ríkislögreglustjóra sé heimilt að leita hjá skattrannsóknarstjóra í því skyni að leggja hald á tiltekin gögn.

Bryndís Kristjánsdóttir skattrannsóknarstjóri staðfestir að ágreiningur sé milli embættanna um afhendingu gagna og að málið sé fyrir dómstólum. Úrskurður héraðsdóms hefur verið kærður til Hæstaréttar af hálfu skattrannsóknarstjóra og er niðurstöðu hans beðið. Bryndís segir að einsdæmi hljóti að teljast að dómstóll skuli með úrskurði veita lögreglu húsleitarheimild hjá skattrannsóknarstjóra en hún tjáir sig ekki frekar um málið á meðan það er til meðferðar hjá dómstólum.

Ágreining embættanna um afhendingu gagna má rekja til ársins 2006 þegar ríkislögreglustjóra var neitað um gögn hjá skattrannsóknastjóra á þeim forsendum að þau væru lögreglu óviðkomandi.

Helgi Magnús Gunnarsson, saksóknari efnahagsbrota, segir að dómkrafa ríkislögreglustjóra nú byggist á úrræði í lögum um meðferð opinberra mála frá 1991. „Ef Hæstiréttur staðfestir úrskurð héraðsdóms, mun þó ekki koma til þess að farið verði í eiginlega húsleit hjá skattrannsóknarstjóra samkvæmt orðanna hljóðan,“ segir hann. „Við gerum ráð fyrir því að fá gögnin einfaldlega afhent. Skattrannsóknarstjóri heldur því fram að það sé mikill vafi á því að rannsóknarlögreglustjóri hafi heimildir til að fá aðgang að þessum gögnum.

Ég hef litið á málið sem ágreining um túlkun laga sem hefur náð ákveðnu hámarki núna og við þurfum að bíða dóms Hæstaréttar. Það verður að hafa í huga að sem ákæruvald erum við að uppfylla skyldur okkar um að rannsaka mál og við getum ekki vanrækt þann hluta málsins sem snýr að gagnaöflun.“

Í hnotskurn