Sakborningar í Héraðsdómi Reykjavíkur í dag. mbl.is/Golli

Sakborningar í Fáskrúðsfjarðarmálinu svonefnda játuðu að mestu leyti sök þegar málið var þingfest í Héraðsdómi Reykjavíkur í dag. Þeir gerðu þó athugasemdir við það magn fíkniefna, sem þeir eru ákærðir fyrir að hafa reynt að smygla til landsins. Fram kom m.a. sú skoðun þeirra, að raki hefði komist í efnin og þau því verið þyngri við vigtun lögreglu.

Einar Jökull Einarsson, sem er ákærður er fyrir að hafa skipulagt smyglið, játaði sakargiftir en gerði fyrirvara um magn fíkniefnanna. Ákært er smygl á 23,5 kílóum af amfetamíni, tæpum 14 kílóum af e-töfludufti og 1747 e-töflum til landsins með skútu sem lagðist að bryggju í Fáskrúðsfirði í september.

Bjarni Hrafnkelsson játaði að hafa pakkað efnunum inn í íbúð í Kaupmannahöfn í ágúst á síðasta ári en sagðist ekki hafa komið að skipulagningu smyglsins að öðru leyti.

Þeir Alvar Óskarsson og Guðbjarni Traustason, sem sigldu skútunni til landsins, játuðu þann þátt en sögðust hafa verið beðnir um þetta eina verk í tengslum við smyglið.

Marinó Einar Árnason játaði að hafa tekið á móti skútunni í Fáskrúðsfirði og að hafa komið með vistir fyrir skútumennina svo þeir gætu siglt til baka. Þá játaði Arnar Gústafsson að hafa átt að taka við pakka, sem hann ætlaði að geyma á   sumarbústaðarlandi foreldra sinna í Rangárvallasýslu. Hann sagðist hins vegar ekki hafa vitað hvað í pakkanum var.

Aðalmeðferð í málinu verður 31. janúar.