Ljósvakamiðlum er heimilt að nota tónverk í kynningu á einstökum útvarps- og sjónvarpsþáttum, að eigendum flutningsréttar forspurðum, samkvæmt samningi sem STEF hefur gert við ljósvakamiðla. Í pistlinum Af listum sem birtist í Morgunblaðinu í dag er þeim hugmyndum varpað fram, að í ljósi þess að fjölmiðlalandslagið hafi tekið miklum breytingum á undanförnum 20 árum, eða frá því að STEF gerði samning sinn við Ríkisútvarpið, sé ekki úr vegi að samningarnir séu endurskoðaðir með hagsmuni tónskálda og eigenda flutningsréttar að markmiði. Eiríkur Tómasson, framkvæmdastjóri STEFs, hefur áður sagt samningana góða enda séu þeir sambærilegir við það sem tíðkist í nágrannalöndunum.