Hæstiréttur hefur dæmt tvo karlmenn á fertugsaldri í 5 mánaða fangelsi hvorn fyrir líkamsárás í húsi við Hverfisgötu í Reykjavík sumarið 2006. Mennirnir voru í Héraðsdómi Reykjavíkur dæmdir í 18 og 12 mánaða fangelsi en Hæstiréttur taldi ekki að brot mannanna væri hægt að heimfæra undir ákvæði hegningarlaga um stórfellda líkamsárás eins og héraðsdómur hafði gert.

Annar maðurinn var sakfelldur fyrir að hafa hrint þriðja manninum utan í vegg, slegið hann nokkur hnefahögg og sparkað í hann liggjandi nokkrum sinnum með þeim afleiðingum að hann hlaut áverka í andliti og á líkama.

Hæstiréttur segir að ekki sé hægt að fullyrða að hinn maðurinn hafi  tekið beinan þátt í líkamsárásinni en talið að hann hefði veitt liðsinni þannig að hann teldist hlutdeildarmaður í brotinu. Sá rauf skilyrði reynslulausnar en hann var dæmdur fyrir að ryðjast inn á ritstjórn blaðs og ganga þar í skrokk á ritstjóra þar sem hann var ósáttur við umfjöllun viðkomandi fjölmiðils.

Hinn maðurinn hafði ekki áður gerst sekur um refsivert brot. Atlaga hans þótti tilefnislaus og illyrmisleg.