„Ég áttaði mig á því áðan þegar ég var að tala um atburði undanfarinna daga að þetta er mjög kunnugleg orðræða. Ég er að tala um þetta eins og ég talaði um REI-málið á sínum tíma,“ segir Svandís Svavarsdóttir, oddviti Vinstri grænna í borgarstjórn Reykjavíkur, um myndun nýs meirihluta Sjálfstæðisflokks og F-lista.

„Þarna er verið að blekkja, þarna er verið að vinna hratt, þarna er verið að vinna með leynd og í samráðsleysi án umboðs. Það eru sömu fingraförin í þessu máli og í REI-málinu og þau eru Vilhjálms Þ. Vilhjálmssonar.“

Ólafur segir ósatt

Ólafur F. Magnússon, verðandi borgarstjóri, fullyrti á þriðjudag að Svandísi Svavarsdóttur hefði verið boðin staða borgarstjóra færi hún í meirihlutasamstarf með sjálfstæðismönnum. Svandís segir þetta vera ósatt. „Þetta var sagt við mig fyrst eftir að nýr meirihluti tók við í haust. En það er ósatt að það hafi verið einhverjar samræður í gangi á síðustu dögum og vikum.“

Margrét Sverrisdóttir, varaborgarfulltrúi F-listans, tekur í sama streng. „Þetta virðast vera blekkingar á báða bóga, sama óðagotið og litla samráðið sem var í REI-málinu. Ég held að það liggi fyrir, líkt og Ólafur staðfesti, að honum var sagt að það yrði myndaður annar meirihluti ef hann yrði ekki fyrri til. Þetta eru ekkert annað en blekkingar.“

Hálftíma fyrir blaðamannafund

24 stundir sögðu frá því í gær að borgarfulltrúar Sjálfstæðisflokksins hefðu ekki vitað af því að Magréti hugnaðist ekki að starfa fyrir nýjan meirihluta fyrr en innan við klukkustund áður en myndun hans var tilkynnt.

Samkvæmt heimildum 24 stunda var varaborgarfulltrúum flokksins ennfremur ekki tilkynnt um að nýr meirihluti hefði verið myndaður fyrr en klukkan hálfsjö á mánudag, hálftíma áður en blaðamannafundurinn átti að hefjast.

Í hnotskurn

Tilkynnt var um myndun nýs meirihluta í borgarstjórn Reykjavíkur á mánudag. Að honum standa Ólafur F. Magnússon, borgarfulltrúi F-lista, og borgarfulltrúar Sjálfstæðisflokksins. Ólafur kom einnig að myndun fráfarandi meirihluta í borgarstjórn í október síðastliðnum.