Nemendum í grunnskólum Reykjanesbæjar hefur fjölgað ört í vetur. Metfjölgun var í haust en þá voru nemendur 130 fleiri en haustið áður og 30 til 40 börn bættust svo við nú í upphafi árs. Mest hefur mætt á Njarðvíkurskóla í þessum sviptingum.

Nú eru um 2.010 börn í sex grunnskólum í Reykjanesbæ, að sögn Eiríks Hermannssonar fræðslustjóra en haustið 2006 voru 1.845 börn við nám. Aukningin er vegna fjölgunar íbúa, ekki síst í nýja hverfinu, Vallarheiði á Keflavíkurflugvelli, og í nýju hverfunum í Innri-Njarðvík. Á Vallarheiði var í fyrra opnaður nýr skóli fyrir yngstu börnin á vegum Hjallastefnunnar og Akurskóli í Tjarnahverfi í Innri-Njarðvík er byggður upp smám saman. Þar eru börn úr nýju hverfunum í fyrsta til áttunda bekk og einn árgangur bætist við næsta haust. Tveir elstu árgangarnir eru enn í Njarðvíkurskóla.

„Þetta hefur gengið merkilega vel,“ segir Eiríkur þegar hann er spurður að því hvernig gengið hafi að taka við þessum mikla fjölda. Hann segir að mesta fjölgunin hafi verið í Njarðvíkurskóla og þar sé kennt í hverjum krók og kima.

Reiknað er með að álagið í Njarðvíkurskóla jafnist út á næstu tveimur árum, að sögn Láru Guðmundsdóttur skólastjóra. Er það vegna þess að útlit er fyrir að lítill árgangur hefji nám við skólann í haust í stað stórs tíunda bekkjar og vegna þess að Akurskóli tekur smám saman við öllum börnum úr hverfunum í Innri-Njarðvík.