Samninganefndir Starfsgreinasambandsins og Flóabandalagsins funduðu með fulltrúum Samtaka atvinnulífsins hjá ríkissáttasemjara í gær. Kristján Gunnarsson segir að SA hafi ákveðið að tala við önnur landssamtök og því hafi hann frestað fyrirhuguðum fundi með viðræðunefndum Starfsgreinasambandsins til fimmtudags, en hann átti að vera í dag. Aðferðafræðin í launamálunum sé háð því að samhljómur ríki meðal landssambanda og mikilvægt sé að allir gangi í takt. SA hafi þurft tíma til að fara yfir þessi mál með öðrum landssamböndum og því hafi hann frestað sínum fundi.

Kristján segir að nái menn samkomulagi um aðferðafræðina gangi hlutirnir hratt fyrir sig í kjölfarið. Hann segir að útspil SA hafi breyst og þróast og því hafi þokast í rétta átt. Starfsgreinasambandið geri áfram kröfu um 20 þúsund króna hækkun á taxta, kröfu um almenna 4% hækkun og hækkun lágmarkslauna. Í stað samnings til tveggja ára sé talað um samning í eitt ár með möguleika á framlengingu í tvö ár ef ákveðin skilyrði séu fyrir hendi, það er að kaupmáttur hafi ekki farið minnkandi og að verðlagsforsendur séu innan tilskilinna marka.

„Við erum farnir að ræða um innihald samningsins núna í stað þess að ræða um forsendur,“ segir Kristján.