Öll símafyrirtækin auglýsa ótakmarkað erlent niðurhal en flest þeirra setja þó takmarkanir á hið endalausa. Þeir sem hala of mikið niður fá skerta þjónustu.

„Ég er með 12 megabæta tengingu og ótakmarkað niðurhal. Ótakmarkað niðurhal er 80 gígabæt og það er núna búið að hefta þessa 12 megabæta tengingu mína niður í 512. Ég get ekkert sagt eða gert annað en segja upp áskriftinni minni,“ segir Jóhann Kiesel, viðskiptavinur Símans, um ástand nettengingar sinnar eftir að Síminn setti hömlur á hann fyrir að hafa farið yfir kvótann á erlendu gagnamagni. Síminn er síður en svo eina fyrirtækið sem setur takmarkanir á ótakmarkað niðurhal.

Hægt eða aftengt

Þrátt fyrir að auglýsingar gefi annað til kynna eru íslensku fjarskiptafyrirtækin með takmarkanir á niðurhali viðskiptavina sinna sem telja sig vera með ótakmarkað niðurhal. Fyrirtækin setja sér sérstök mörk sem viðskiptavinir eiga helst ekki að fara yfir. Þeir sem fara yfir þessi mörk geta átt von á því að hægt verði á tengingu þeirra, þeir aftengdir um stundarsakir eða þá fyrir fullt og allt. Hrannar Pétursson, upplýsingafulltrúi Vodafone, segir að takmarkanirnar á Vodafone-tengingum ættu ekki að koma neinum á óvart. „Þetta gagnamagn sem um ræðir er skilgreint í skilmálum sem eru tengdir hverjum viðskiptum þannig að þetta á að vera öllum ljóst.“

Hann segir að flestir viðskiptavinir Vodafone, um 99,9 prósent, séu undir þessum mörkum og þar að leiðandi sé niðurhalið ótakmarkað fyrir nær alla viðskiptavini. „Ég held því að orðið ótakmarkað sé miklu nær því að vera lýsandi fyrir fólk heldur en að segja 80 gígabæta niðurhal.“

Hive í sérstöðu

Hive er eina fjarskiptafyrirtækið sem stendur við loforðið um ótakmarkað niðurhal. „Hive var fyrst til að bjóða ótakmarkað niðurhal og hefur ekki takmarkað það síðan það kom á markaðinn,“ segir Ómar Ægisson, sölu- og markaðsstjóri Hive.

Í hnotskurn

Síminn: Erlent niðurhal meira en 20 gígabæt á viku. Vodafone: Erlent niðurhal yfir 80 gígabæt á mánuði. Sko: Erlent niðurhal yfir 80 gígabæt á mánuði. Hive: Ekki neinar takmarkanir.