Eftir Andra Karl andri@mbl.is

Nýgerðir kjarasamningar aðildarsamtaka ASÍ og Samtaka atvinnulífsins eru aðeins eitt skref af mörgum. Fjölmargir aðilar eiga eftir að semja á komandi mánuðum – 323 samningar eru annaðhvort lausir eða losna á árinu – og eiginlega út árið. Meðal annars er stutt í að kennarar gangi að samningaborðinu og segir formaður Kennarasambands Íslands ljóst að samningar ASÍ og SA geti aldrei orðið uppskrift að lausn fyrir þær viðræður. Svipaðar raddir hafa heyrst úr öðrum herbúðum.

Um 9.500 manns starfa innan aðildarfélaga KÍ og rennur kjarasamningur framhaldsskólakennara og ríkisins fyrstur út, 30. apríl, en samningur grunnskólakennara og skólastjóra mánuði síðar. „Einhverjar þreifingar eru byrjaðar en þær er mestmegnis óformlegar. Menn eru svona að fara yfir sín mál og stilla upp sínum hlutum,“ segir Eiríkur Jónsson, formaður KÍ. Hann segir ljóst að samningur ASÍ og SA hafi ekkert gildi auk þess sem skoða þurfi áhrif aðgerða ríkisstjórnarinnar og telur ólíklegt að kennarar hefðu samþykkt sömu forgangsröðun. Hann tekur jafnframt fram að nauðsynlegt sé að fara með bjartsýni inn í viðræðurnar.

Hjá Bandalagi háskólamanna og Bandalagi starfsmanna ríkis og bæja eru samningar einnig að losna og semja þarf fyrir um 28 þúsund manns. Samningar opinberra starfsmanna gagnvart ríkinu verða lausir í lok apríl og gagnvart sveitarfélögum í lok október. Á sama tíma losna samningar lögreglumanna og tollvarða og mánuði síðar hjá slökkviliðsmönnum.

Hjá BHM eru samningar lausir 30. apríl og reiknar Stefán Aðalsteinsson framkvæmdastjóri með að línurnar verði jafnvel lagðar á morgun, á miðstjórnarfundi. Hann býst þó ekki við að sami háttur verði hafður á og við síðustu viðræður en þá skrifuðu 24 af 25 félögum undir sama samninginn en eitt þeirra felldi hann í atkvæðagreiðslu.