Í yfirlýsingu ríkisstjórnarinnar varðandi kjarasamningana eru húsnæðismál veigamikill þáttur. Bæði er fjallað um breytingar á almennum leigumarkaði og í félagslega kerfinu. Jafnframt eru tiltekin atriði til þess fallin að létta ungu fólki kaup á sinni fyrstu fasteign. Meðal þess sem þar kemur fram er loforð um að ríkisstjórnin beiti sér fyrir því að stimpilgjöld verði felld niður vegna lána til kaupa á fyrstu fasteign. Þá verði skerðingarmörk vaxtabóta hækkuð og komið á nýju húsnæðissparnaðarkerfi með skattafrádrætti fyrir fólk undir 35 ára aldri.

Jóhannes Gunnarsson, formaður Neytendasamtakanna, segir það vonbrigði hversu skammt er gengið í afnámi á stimpilgjöldum. „Það er afskaplega skammt gengið að ætla aðeins að afnema stimpilgjöld af kaupum á fyrstu íbúð. Það er í engu samræmi við stjórnarsáttmála ríkisstjórnarinnar um afnám stimpilgjalda. Ég fagna því auðvitað að ungt fólk fái þessi gjöld afnumin, ekki veitir af því en ég hefði hins vegar viljað sjá þau afnumin að fullu. Ég varð fyrir vonbrigðum með þessa ákvörðun.“

Ingibjörg Þórðardóttir, formaður Félags fasteignasala, segir þau atriði sem snúa að húsnæðismálum í yfirlýsingu ríkisstjórnarinnar vera þunnan þrettánda. „Mér finnst þetta vera mjög almennt orðað. Hvað varðar stimpilgjöldin þá er vissulega mjög gott að þau skuli afnumin af kaupum á fyrstu íbúð, það léttir mjög á ungu fólki sem er að koma undir sig fótunum. Hins vegar eru það mikil vonbrigði að þessi gjöld skuli ekki afnumin með öllu því þessi gjaldtaka kemur illa niður á miklu fleirum en bara þeim sem eru að kaupa í fyrsta skipti.“