Árið 2002 voru meðaldagvinnulaun framhaldsskólakennara þau sömu og meðaldagvinnulaun félagsmanna BHM. Um mitt síðasta ár voru meðaldagvinnulaun kennara hins vegar komin 7 prósentum niður fyrir meðaldagvinnulaun félagsmanna BHM. Í krónum talið var munurinn í júlí um 20 þúsund krónur á mánuði og síðan hefur bilið haldið áfram að breikka.

Þetta gerist þrátt fyrir að framhaldsskólar séu í sama launakerfi og flest önnur stéttarfélög opinberra starfsmanna. Stíf hagræðingarkrafa er gerð til framhaldsskólanna sem bitnar beint á námi og kennslu. Samkvæmt tölum frá Hagstofunni hefur nemendum fjölgað hlutfallslega mun meira en kennurum og hefur það bætt rekstrarskilyrði framhaldsskólanna. Kennarar hafa þó ekki notið þeirrar „framleiðniaukningar“ í bættum kjörum.

Á þetta er bent í ályktun sem félög kennara og stjórnenda í framhaldsskólum hafa sent frá sér. Þar segir einnig að samanburður milli landa á kennaralaunum sem hlutfall af landsframleiðslu á mann sé ekki uppörvandi fyrir íslenska kennara. Hlutfallsleg launastaða þeirra sé mjög slök miðað við flest önnur OECD ríki og sé kaupgeta meðalgrunnlauna framhaldsskólakennara á Íslandi hin fimmta lægsta í OECD ríkjunum.