Meirihluti ungmenna sem tóku þátt í rannsókn á viðhorfi ungs fólks á forvarnarstarfi lögreglunnar og aðgengi að fíkniefnum segist hafa fengið einhverja fræðslu hjá lögreglu og meirihluti þeirra sem fengu fræðslu var mjög eða frekar ánægð með hana.

Rannsóknasetur í barna- og fjölskylduvernd (RBF) við Háskóla Íslands hefur lokið rannsókn á viðhorfi ungs fólks til forvarnastarfs lögreglu og aðgengi að fíkniefnum sem unnin var fyrir ríkislögreglustjóra.

Rannsóknin byggir á svörum 811 ungmenna í lok árs 2007, en tekið var 1200 manna úrtak úr þjóðskrá meðal fólks á aldrinum 18-20 ára og er svarhlutfall 68%.

Helstu niðurstöður rannsóknarinnar eru þær að 76% svarenda höfðu fengið einhverja fræðslu hjá lögreglu og meirihluti þeirra sem höfðu fengið fræðslu (74%) var mjög eða frekar ánægður með hana. Algengast var að þeir sem höfðu fengið einhvers konar fræðslu hefðu fengið fræðslu um umferðarreglurnar.

Um 70% sögðust vera mjög eða frekar jákvæðir gagnvart lögreglunni sem er hlutfallslega fleiri ungmenni samanborið við árið 2004. Þá virðist skv. rannsókninni að forvarnafræðsla lögreglu auki líkur á jákvæðu viðhorfi til lögreglu, sem er í samræmi við fyrri rannsókn.

Flestum boðið upp á fíkniefni í partíum

Um 60% svarenda hafði verið boðin fíkniefni. Þetta er álíka hátt hlutfall og árið 2004 þegar 62% svarenda hafði verið boðin fíkniefni. Meðal svarenda sem sögðust hafa verið boðin fíkniefni sögðu um 62% það vera í partíi, um 41% erlendis, 40% í miðbænum, 39% á skemmtistað, 30% í framhaldsskóla, 28% á útihátíð, 13% í hverfinu heima, 11% á skólaballi, 10% í grunnskóla, 3% í félagsmiðstöð og 2% í íþróttum. Um 4% nefndu aðra staði.

Um 15% sögðust þekkja mjög vel til þess hvernig nálgast megi fíkniefni svo sem hass, amfetamín, kókaín og e-töflur hér á landi, 23% frekar vel, 7% hvorki vel né illa, 20% frekar illa og 35% mjög illa.

Nánari upplýsingar um rannsóknina