Dánarbú Kjarvals á ekki myndir Reykjavíkurborgar
Jóhannes Kjarval. Golli / Kjartan Þorbjörnsson
Hæstiréttur hefur hafnað kröfu dánarbús listmálarans Jóhannesar Kjarvals um að viðurkenndur yrði eignarréttur þess að munum, sem fluttir voru úr vinnustofu listmálarans síðla árs 1968. Var dómur Héraðsdóms Reykjavíkur staðfestur.
Um er að ræða fjölda listaverka og annarra muna sem geymdir voru í húsnæði sem Kjarval hafði umráð yfir að Sigtúni 7 í Reykjavík. Gjöfin var mikil að umfangi, meðal annars voru þar 5.062 myndverk af ýmsum gerðum.
Dánarbúið byggði kröfu sína á því, að ekki væri sannað að Kjarval hefði með munnlegri yfirlýsingu 7. nóvember 1968 gefið Reykjavíkurborg munina heldur aðeins afhent borginni þá til geymslu.
Guðmundur Alfreðsson bar fyrir dómi, að hann hefði verið viðstaddur þegar Kjarval gaf Reykjavíkurborg munina með munnlegri yfirlýsingu til Geirs Hallgrímssonar, þáverandi borgarstjóra. Í málinu voru lagðar fram dagbókarfærslur Guðmunda frá þessum tíma sem staðfestu frásögn hans.
Þá var í minnisblaði Baldurs Guðlaugssonar, dags. 21. september 1982, haft eftir Guðmundi að hann hefði verið sannfærður um að um gjöf hefði verið að ræða.
Eftir að dómur var kveðinn upp í málinu í Héraðsdómi Reykjavíkur gaf Jón Halldór Gunnarsson, sendibílstjóri, skýrslu fyrir dómi en hann aðstoðaði við flutning gagnanna 1968. Segir Hæstiréttur, að framburður hans hafi rennt enn frekari stoðum undir að um gjöf hefði verið að ræða.
Í niðurstöðu Hæstaréttar segir að gögn málsins bendi eindregið til þess að ákvörðun Kjarvals um að afhenda Reykjavíkurborg þá muni sem um ræði, hefði átt aðdraganda og mótast á nokkrum tíma, einkum eftir að borgin ákvað að reisa listasafn og sýningahús sem skyldi bera nafn listamannsins. Taldist því sannað að Kjarval hefði gefið Reykjavíkurborg þá muni sem málið snérist um með munnlegri yfirlýsingu.
