Eldri borgarar í golfklúbbnum Nesi hittast reglulega og æfa púttin á púttvelli Rafveitunnar í Elliðaárdal. Árvakur/Golli

Meirihluti svarenda í könnun Capacent Gallup sem lögð var fyrir eldri borgara er ánægður með þá þjónustu sem þeir njóta. Þá er heilsufar svarenda almennt gott, 63% segja heilsufar sitt gott, 74% eru líkamlega vel á sig komnir miðað við aldur og 65% svarenda hreyfa sig vikulega eða oftar.

Á tímabilinu 29. nóvember 2007 til 9. janúar 2008 lagði Capacent Gallup spurningakönnun fyrir eldri borgara, 80 ára og eldri, og var rannsóknin var unnin af Capacent Gallup fyrir Velferðarsvið Reykjavíkurborgar. Í rannsókninni voru hagir þeirra, s.s. húsnæðisaðstæður, heilsufar, þjónusta og félagsleg tengsl rannsökuð og viðhorf þeirra til þjónustu og úrræða. 

„Sérstaka athygli vekur að mikill meirihluti telur sig ekki vera félagslega einangraðan og segist njóta góðra og reglulegra samskipta við börn, ættingja og vini. Rúmlega þriðjungur svarenda tekur virkan þátt í félagsstarfi eldri borgara og um fjórðungur viðmælenda kveðst einnig taka þátt í annars konar félagsstarfi," segir í tilkynningu frá Velferðarsviði.

Í úrtaki voru 1000 Reykjavíkurbúar 80 ára og eldri, valdir af handahófi úr þjóðskrá. Svarhlutfall var 58,8%.