Árni M. Mathiesen, fjármálaráðherra Árvakur/Árni Sæberg

Skipun héraðsdómara við Héraðsdóm Norðurlands eystra og Héraðsdóm Austurlands var til meðferðar hjá Árna M. Mathiesen, settum dómsmálaráðherra, frá hádegi þann 18. desember til dagsloka þann 20. desember.

Þetta kemur fram í svari dómsmálaráðherra við fyrirspurn Árna Þórs Sigurðssonar, þingmanns VG, á Alþingi.

Árni spurði hvenær Árni hefði verið settur til að gegna embætti dómsmálaráðherra við skipan héraðsdómarans. Fram kemur í svarinu, að á ríkisstjórnarfundi þann 18. desember hafi forsætisráðherra lagt fram og kynnt tillögu til forseta Íslands, dagsetta sama dag, um dóms- og kirkjumálaráðherra viki sæti vegna skipunar héraðsdómara og að fjármálaráðherra yrði falið að fara með málið og taka ákvörðun í því.

Um hádegi sama dag eftir ríkisstjórnarfundinn fór Árni í dóms- og kirkjumálaráðuneytið og fékk öll gögn, sem vörðuðu málið, afhent. Um var að ræða öll gögn sem á málið voru skráð, þ.e. umsóknir ásamt fylgigögnum, álit dómnefndar og önnur bréf tengd málinu og auk þess eldri umsóknir umsækjenda og fylgigögn, sem fyrir lágu í ráðuneytinu.

Fram kemur í svarinu að Árni aflaði sér ekki nýrra gagna og hann leitaði ekki til meðmælenda en skrifleg meðmæli sem fyrir lágu í málinu höfðu áhrif á ákvörðun ráðherrans.

Einnig kemur fram, að þann 7. nóvember voru dómnefnd sendar til umsagnar umsóknir og önnur gögn umsækjenda. Þann 29. nóvember barst ráðuneytinu svar dómnefndar ásamt umsögn um umsækjendur. Umsækjendum var sent álit dómnefndar þann 11. desember og fengu þeir frest til 17. desember til að bregðast við þeim með athugasemdum.