Einungis tveir fundir voru haldnir í byggingarnefnd Laugardalsvallar, sem átti að sinna eftirliti með framkvæmdum við völlinn sem hófust haustið 2005. Samkvæmt lokauppgjöri verksins er kostnaður vegna þess 1.613 milljónir króna og í óundirrituðum viðaukasamningi við framkvæmdina er hlutur Reykjavíkurborgar í framúrkeyrslunni áætlaður 399,4 milljónir króna.

Í fundargerð seinni fundarins, sem haldinn var 3. apríl 2006, segir orðrétt að „samningur var undirritaður við Ístak hf. 21. desember um verkið upp á 986.226.284 kr.“ Í sömu fundargerð er bókað að verkið sé á áætlun. Dagur B. Eggertsson sat í nefndinni á þessum tíma og fram að valdaskiptum í borginni þann 13. júní 2006. Hann segir að þá hafi sér verið sagt að sér yrði skipt út. Nýr maður, Björn Ingi Hrafnsson, var þó ekki skipaður fyrr en 13. september. Þórir Hákonarson, framkvæmdarstjóri KSÍ, staðfesti við 24 stundir í gær að engir fundir hefðu verið haldnir í tíð meirihluta Framsóknar og sjálfstæðismanna.

Bókað að verkið sé á áætlun

Dagur segir að þetta sé hið alversta mál og mjög alvarlegt. „KSÍ fær þennan samning með þeim rökum að þeir séu sérfræðingar í svona framkvæmdum og því sé mun betra að þeir sjái um framkvæmdina en Reykjavíkurborg. En mér finnst þetta fara úr böndunum án þess að borgin sé látin vita. Þegar ég sat í byggingarnefndinni var bókað að verkið væri á áætlun. Maður treystir náttúrlega því sem manni er sagt. Ég hef engar forsendur til annars.“

Vilhjálmur Þ. Vilhjálmsson, fyrrverandi borgarstjóri, segir alveg ljóst að allar meiriháttar ákvarðanir um framkvæmdina hafi þegar verið teknar þegar nýr meirihluti tók við. „Í samningnum segir að byggingarnefndin eigi að hafa eftirlit með framkvæmdinni. Það má velta því fyrir sér hvers vegna hún hittist ekki nema tvisvar á öllum þeim tíma þegar verið er að taka allar meiriháttar ákvarðanir sem leiða til þessara útgjalda. Björn Ingi kemur inn í nefndina 13. september 2006. Þá er haldinn einn fundur sem innri endurskoðun sagði mér frá. En fyrir þennan tíma var búið að taka allar meiriháttar ákvarðanir. Það má því alveg spyrja sig af hverju nefndin sem starfaði þarna um haustið og fram á vor var ekki búin að halda 30 fundi.“

Umboðslaus vinnubrögð

„Mér finnst blasa við að hlutirnir hafa farið úr böndunum og alls ekki hafið yfir allan vafa að KSÍ geti gert kröfu á Reykjavíkurborg þegar kostnaðaraukinn er orðinn svona mikill,“ segir Svandís Svavarsdóttir, borgarfulltrúi Vinstri grænna. Hún segir að viðlíka eftirlitsleysi með nýtingu opinbers fjármagns gangi ekki. „Við höfum einfaldlega ekkert umboð til að vinna með þessum hætti. Þetta er skattfé sem við erum með undir höndum sem við eigum ekki heldur erum vörslumenn fyrir. Okkur ber að fara þannig með það að það sé hafið yfir allan vafa. Það er ekki þannig í þessu tilviki.“