„Aðrir lyfjainnflytjendur geta flutt inn lyf frá öðrum markaðssvæðum að uppfylltum sérstökum skilyrðum Lyfjastofnunar. Ef lyfin eru til hjá þeim getur það gerst að ekkert selst hjá okkur. Þegar þau klárast fara lyf sem ekki hafa selst hjá okkur í einhvern tíma að seljast. Það sama á við þegar samheitalyf vantar. Við bregðumst þá eins hratt við og hægt er,“ segir Guðbjörg. Hún segir jafnframt að Vistor, sem er sölu- og markaðsfyrirtæki og fulltrúi margra frumlyfjaframleiðenda, gangi eins hratt í málin og unnt er sé vöntun fyrirsjáanleg.

„Það er alveg ljóst að best er að eiga alltaf öll lyf. Það eru allir boðnir og búnir til að leysa slík mál vegna þess að þetta bitnar fyrst og fremst á sjúklingum. Það viljum við ekki að gerist.“

Hjördís Árnadóttir, sviðsstjóri ytri samskipta hjá Actavis, segir enga einhlíta skýringu til á því hvers vegna lyf skortir stundum tímabundið. „Við gerum það sem við getum til að nauðsynlegustu lyfin fari aldrei á bið. Við forgangsröðum í framleiðslunni. Það hefur þó einstaka sinnum komið fyrir röð af atvikum þannig að lyf sem við hefðum viljað hafa í forgangi hafa ekki verið til í nokkra daga.“

Að sögn Hjördísar er lyf eins og íbúfen ekki efst á forgangslista. „Íbúfen er hins vegar eitt af söluhæstu lyfjunum og það er ekki okkar hagur að hafa það ekki til sölu. En þótt það hafi ekki fengist í lausasölu var hægt að fá það gegn lyfseðli. Skorturinn stafaði af því að hráefnisbirgir sem útvegaði virka efnið í lyfið hætti starfsemi og útvegun annars birgis tók lengri tíma en vonast var til.“

ingibjorg@24stundir.is