„Við hugsuðum með okkur að þetta væri bara eins og með Múhameð og fjallið, ef konurnar komast ekki til Stígamóta fara Stígamót bara til þeirra,“ segir Guðrún Jónsdóttir, talskona Stígamóta, en Zontakonur munu um næstu helgi selja rósanælur til styrktar verkefninu Stígamót á staðinn.

„Við hjá Stígamótum höfðum til skamms tíma áhyggjur af því að við þjónuðum fyrst og fremst íbúum höfuðborgarsvæðisins á meðan við vissum að þörfin væri sú sama um allt land,“ segir Guðrún en samtökin hafa undanfarið leitað leiða til þess þjóna betur konum á landsbyggðinni og síðastliðið vor fóru þau hringferð um landið til þess að kynna þjónustu Stígamóta, kanna jarðveginn og kynna sveitarfélögum þjónustuna.

Sprakk áður en það byrjaði

Guðrún segir Stígamót hafa verið með tilraunaverkefni í samstarfi við sveitarfélög á Austurlandi. „Það var í raun spurngið áður en við byrjuðum því aðsóknin var svo mikil að við urðum að tvöfalda það sem við lögðum fyrst upp með,“ segir Guðrún en ákveðið hefur verið að starfskona Stígamóta haldi áfram að fara austur reglulega og stýra bæði sjálfshjálparhópum og viðtölum.

„Svo hefur þetta tekið á sig ýmsar myndir eftir aðstæðum á hverjum stað,“ segir Guðrún en Stígamót hafa aðstoðað fólk í Vestmannaeyjum sem hefur rekið sjálfshjálparhópa auk þess að eiga systursamtökin Aflið á Akureyri og Sólstafi á Ísafirði. „Þar eru hörkuduglegar konur en þjónustan er takmörkuð þar sem ekki er föst viðvera. „Það er þetta sem við viljum núna bæta úr.“

Guðrún segir smæð samfélaga aðalveikleikann því það er alltaf hluti fólks sem ekki nýtir sér aðstöðuna. „Fólk fer ekki að ræða svona mál við nágrannann,“ segir hún og bætir við: „Starfskona okkar kemur á staðinn en flýgur svo burt með leyndarmálið.“

63 nælur í hádeginu

Alþingismönnum gefst í dag tækifæri til að kaupa fyrstu nælurnar en Zontasamtökin ætla að kynna þeim söfnunina í hádeginu í dag. „Það er yfirlýst stefna hinna alþjóðlegu Zontasamtaka að berjast gegn ofbeldi á konum,“ segir Helga Finnsdóttir hjá Zontasambandi Íslands en nælan verður seld í Hagkaupum, Fjarðarkaupum, Húsgagnahöllinni og Kringlunni, á Ísafirði og Akureyri um helgina.

Í hnotskurn

Stígamót voru stofnuð 8. mars árið 1990. Þangað hafa leitað um 4800 manns frá stofnun. Fólk hefur aðallega leitað aðstoðar vegna sifjaspella og nauðgana en í auknum mæli vegna vændis.