Reisa á 700 fermetra skíðaskála, sem áætlað er að muni kosta um 205 milljónir króna, í Bláfjöllum og er stefnt að verklokum í desember á þessu ári, að sögn Bolla Thoroddsens, formanns íþrótta- og tómstundaráðs Reykjavíkurborgar, sem standa mun straum af kostnaðinum.

„Bygging þessa skála tengist brottflutningi skíðadeilda Víkings og ÍR af Hengilssvæðinu. Við keyptum mannvirkin þar, tvo fasta skála, tvo dagskála og skíðalyftur, fyrir um 40 milljónir króna. Síðan seldum við Orkuveitu Reykjavíkur föstu skálana fyrir 25 milljónir króna. Kostnaður vegna skíðastarfseminnar á Hengilssvæðinu nam um 15 milljónum króna á ári þannig að sú upphæð sparast til framtíðar,“ segir Bolli.

Nýi skálinn, sem verður á milli Breiðabliksskálans og Ármannsskálans, er eiginlega tveir sambyggðir skálar fyrir Víking og ÍR, að því er Bolli greinir frá. „Það munu 25 manns geta gist í risi hvors skála. Á fyrstu hæð verður eldhús, veitingasalur og aðstaða fyrir gesti og gangandi eins og í Bláfjallaskálanum.“

Snjóframleiðsla fyrir lok ársins

Að sögn Bolla verða reistar fleiri snjógirðingar á Bláfjallasvæðinu samtímis því sem stefnt er að því að koma upp snjóframleiðslukerfi. „Það eru vonir okkar að snjóframleiðsla hefjist í lok þessa árs.“

Benedikt Geirsson, formaður stjórnar skíðasvæða höfuðborgarsvæðisins, segir sveitarfélögin sjö sem reka skíðasvæðin í Bláfjöllum og Skálafelli eiga í viðræðum við Orkuveitu Reykjavíkur um vatnsöflun. „Orkuveitan myndi sjá um vatnsöflun og flutninginn á vatninu í brekkurnar og leggja þær lagnir sem þarf vegna flutningsins. Orkuveitan myndi jafnframt útvega stútana. Sveitarfélögin myndu svo kaupa vatn og rafmagn af Orkuveitunni,“ segir Benedikt.

Bora þarf eftir vatni

Eiríkur Hjálmarsson, blaðafulltrúi Orkuveitu Reykjavíkur, segir að bora þurfi eftir vatni í Bláfjöllum þar sem þar sé ekkert yfirborðsvatn. „Væntanlega er ekki þörf á því á Skálafellssvæðinu,“ segir Eiríkur.

Formaður íþrótta- og tómstundaráðs segir endanlegan kostnað vegna snjóframleiðslu ekki liggja fyrir.

Í hnotskurn

Skíðadeildir íþróttafélaganna sinna barna- og unglingastarfi á skíðasvæðunum. Á skíðasvæðunum eru starfræktar skíðaleigur þar sem gestir svæðanna geta leigt sér allan búnað.