Rannsóknastofnun um lyfjamál hyggst reikna út verðmæti þeirra lyfja sem skilað er inn til apóteka en í fyrra létu apótekin eyða alls fimm tonnum af lyfjum. „Við ætlum að hvetja landsmenn í vor til að skila inn lyfjum sem þeir eru hættir að nota þannig að hægt verði að leggja mat á hvað það kostar þjóðarbúið þegar lyf eru ekki notuð. Við ætlum að telja lyfin en nú eru þau bara vegin,“ segir Anna Birna Almarsdóttir, prófessor og forstöðumaður rannsóknastofnunarinnar.

Anna Birna segir að með þessu verði jafnframt hægt að fá einhverja mynd af því hvaða lyfjum sé helst fleygt. „Ef við vitum hvort um er að ræða ákveðna lyfjaflokka þurfum við að koma í veg fyrir að fólk fái of stóra skammta. Það breytist væntanlega með breytingu á lyfjagreiðslukerfinu en könnunin mun gefa vísbendingu um hvort hægt verði að setja einhverjar reglur um hvernig eigi að byrja lyfjanotkun í ákveðnum flokkum.“

Rannsóknastofnun um lyfjamál ætlar jafnframt að rannsaka innlagnir á Landspítala vegna óheppilegrar lyfjanotkunar, að því er Anna Birna greinir frá. „Þá er átt við að viðkomandi hafi annaðhvort fengið lyf sem hann þoldi ekki eða verið á lyfjum sem ekki er gott að nota saman. Við ætlum líka að skoða í gögnum Landspítala hversu algengt það sé að fólk leggist inn vegna þess að það fær ekki lyfin sín.“

ingibjorg@24stundir.is