Undanfarið hefur verið mikil umræða í samfélaginu um mögulega upptöku evru og kosti og galla krónunnar. Það vakti því athygli í síðustu viku þegar fyrirtækið Íshlutir auglýsti vinnuvélar til sölu og verðið var uppgefið í evrum. Hjálmar Helgason, framkvæmdastjóri Íshluta, segir að það sé mun einfaldara fyrir viðskiptavini og fyrirtækið sjálft að gefa upp verð í evrum þar sem miklar sveiflur séu á gengi krónunnar.
„Nýjar vélar eru allar seldar miðað við ákveðið gengi í evrum. Þær vélar sem við tökum upp í sem hlutfall af nývirði markast af evrunni en eins og efnahagslífið er um þessar mundir er eiginlega ekki hægt að gefa upp verð í íslenskum krónum,“ segir Hjálmar og tekur dæmi til að útskýra mál sitt betur: „Til dæmis auglýsa Íshlutir vinnuvél á tíu milljónir íslenskra króna, miðað við að gengi evrunnar sé 100. Þegar viðskiptavinur vill kaupa vélina gæti gengi evrunnar verið orðið 105 en þá hefði vélin átt að kosta 10,5 milljónir í stað 10 milljóna. Það er því miklu auðveldara fyrir alla að auglýsa vélarnar í evrum.“
Minni gengisáhætta
Þrátt fyrir að vélarnar séu auglýstar í evrum borga flestir fyrir þær í íslenskum krónum en Hjálmar segir þó að það sé ekkert mál að greiða í evrum, ef vilji er fyrir hendi. „Fljótlega munum við fara að selja í evrum og sendum þá fjármögnunarfyrirtækjunum reikninga í erlendri mynt. Þetta gerum við til að minnka gengisáhættuna fyrir Íshluti og viðskiptavininn. Við sinnum flestum okkar viðskiptum í evrum, það er það stór hluti af okkar tekjum í beinum tengslum við erlenda gjaldmiðla því við borgum í evrum fyrir megnið af vélunum sem við kaupum.“ Hjálmar segir að fyrirtækið hafi samt sem áður ekki alltaf stundað viðskipti sín Með evrum. „Allt verð er miðað við erlendan gjaldmiðil og af því að sveiflurnar eru svo miklar núna er einfaldara að gefa upp verð í evrum. Við erum ekki eina fyrirtækið sem hefur gefið upp verð í evrum enda er þetta eina leið okkar til að koma með eitthvert mótvægi við sveiflur gengisins. Ef viðskiptavinur kemur í dag og vill fá tilboð í nýja vél, þá fær hann það í evrum ásamt virðisaukaskatti.“
Einfaldari fjármálastjórnun
Aðspurður hvaða áhrif það hefði á rekstur fyrirtækisins ef skipt yrði um gjaldmiðil á Íslandi og evran tekin upp segir Hjálmar að öll fjármálastjórnun yrði mun einfaldari. „Við myndum þá losna við allar þessar sveiflur því að í starfsemi okkar fyrirtækis er útflutningur á notuðum vélum mjög mikilvægur. Við seljum vélar okkar helst í gegnum Evrópu og fáum greitt í evrum. Það yrði til mikillar einföldunar að vera á sama myntsvæði og flestir af birgjum okkar,“ segir Hjálmar og bætir við að Íshlutir bjóði upp á gott verð, en það komi þó evrunni ekki við. „Það hvernig fyrirtækið er rekið gerir okkur kleift að bjóða gott verð á vinnuvélum. Okkar innkaupsverð er mjög áþekkt innkaupsverði samkeppnisaðilanna en aftur á móti rekum við fyrirtækið með töluvert minni kostnaði en aðrir. Þar af leiðandi getum við leyft okkur lægra verð.“
Í hnotskurn
Íshlutir voru stofnaðir árið 1998 en árið 2006 flutti fyrirtækið í 1.500 m 2 húsnæði í Mosfellsbæ. Íshlutir hafa síðan þá vaxið úr fjögurra manna fyrirtæki í 30 manna fyrirtæki sem er leiðandi í innflutningi á vinnuvélum. Íshlutir hafa yfir að ráða 4 fullbúnum viðgerðarbílum sem eru stöðugt á ferðinni um landið.
