Íbúum í jaðarbyggðum höfuðborgarsvæðisins og á landsbyggðarkjörnum, sem sækja vinnu utan búsetusvæðis síns fer fjölgandi. Könnun á ferðavenjum Íslendinga sumarið 2007 leiðir í ljós að um 16% svarenda í jaðarbyggðum höfuðborgarsvæðisins og 10% íbúa landsbyggðarkjarna vinna utan búsetusvæðis og er það nokkur aukning frá sambærilegri könnun 2004. Þá kemur í ljós að um 20% svarenda í Árborg vinna á höfuðborgarsvæðinu skv. könnuninni. Mikill munur kemur fram á ferðavenjum eftir kyni, aldri o.fl. félagsþáttum, auk mismunar eftir árstíðum og búsetu. Ferðamáti hefur þó lítið breyst en rúmlega 90% ferða eru farin í einkabíl.

Þetta má lesa út úr niðurstöðum viðamikillar úttektar dr. Bjarna Reynarssonar, skipulagsfræðings hjá Land-ráði sf., á ferðavenjum landsmanna, sem unnin hefur verið fyrir samgönguyfirvöld. Könnunin er sambærileg við rannsókn sem Bjarni vann sumarið 2004.

Fjölmargar athyglisverðar niðurstöður koma í ljós í könnuninni. Fram kemur að meðalfjöldi ferða landsmanna út fyrir búsetusvæði sitt hefur aukist frá sumrinu 2004. Að meðaltali fóru svarendur í 14 slíkar ferðir í júní til ágúst 2004 en fjöldi þessara ferða mældist 15 að meðaltali sl. sumar og er aukningin mest frá jaðarbyggðum höfuðborgarsvæðisins. Meðal-ferðatími út fyrir búsetusvæði er þó svipaður og á árinu 2004 eða 2 tímar og 45 mínútur.

Um 15% svarenda í könnuninni dveljast meira en tvo mánuði samtals á ári utan lögheimilis síns, þar af um þriðjungur vegna vinnu eða skóla og 15% dvelja í sumarhúsi. Raunar benda niðurstöðurnar til þess að ferðum í sumarhús hafi fækkað frá 2004 en þá voru þær 10 að meðaltali yfir sumarið en voru fimm sumarið 2007.