eftir Rúnar Pálmason runarp@mbl.is

Einn landvörður verður að störfum við Geysi og Gullfoss í sumar, frá miðjum júní fram í miðjan ágúst. Börkur Hrólfsson sem er reyndur leiðsögumaður segir að þetta sé allt of lítið og full þörf sé á að hafa tvo landverði að sumarlagi og a.m.k. einn að vetrarlagi. Umgengni á Geysissvæðinu sé skelfileg og merkingar svo slælegar að ferðamenn séu í stórhættu. „Ég hef mestar áhyggjur af því að þetta verði ekki lagað fyrr en það verður stórslys, það er að segja banaslys, því það hafa nú þegar orðið stórslys þarna,“ segir hann.

Börkur bendir á að Geysir sé vinsælasti viðkomustaður erlendra ferðamanna í dagsferðum, ásamt Gullfossi og Þingvöllum, en saman mynda þessir staðir Gullna hringinn svokallaða. Hann hefur þungar áhyggjur af ástandinu á Geysissvæðinu og hefur haft þær lengi. „Fólk æðir þar út um allt. Merktir göngustígar eru ógreinilegir og á veturna þegar allt er á kafi í snjó sjást þeir alls ekki. Merkingarnar, bönd sem eru í um 30 sentimetra hæð frá jörðu, snjóar í kaf. Fólk gengur fram og aftur yfir svæðið eins og því sýnist og spænir niður viðkvæmt hverahrúður,“ segir hann. Þá setji fólk sig í stórhættu þegar það standi á skálarbörmum Geysis og Strokks. Það viti ekki betur enda séu merkingar afar óljósar. „Það þarf ekki að spyrja að því hvað gerist ef einhver misstígur sig og dettur ofan í,“ segir Börkur. Íslendingar sem komi með erlenda gesti með sér séu oft og tíðum verstir í þessum efnum. Þetta eigi þó ekki við um lærða leiðsögumenn.