Þyrla Landhelgisgæslunnar á snjóflóðaæfingu á Sandskeiði. Eggert Jóhannesson

Í dag stendur yfir viðamikil björgunaræfing ofan við Sandskeið þar sem björgunarsveitir Slysavarnafélagsins Landsbjargar, Landhelgisgæslan og greiningasveit Landspítala háskólasjúkrahúss æfa viðbrögð við snjóflóði fyrir ofan Sandskeið. 

Notast er við búnað sem er sérhannaður til snjóflóðaleitar úr þyrlum en Slysavarnafélagið Landsbjörg færði LHG slíkan búnað að gjöf í tilefni af 80 ára afmæli félagsins fyrir skömmu.  Búnaðurinn sem er af gerðinni Barryvox VS 2000 Pro er nýr af nálinni og með því fullkomnasta sem til er í heiminum í dag en  vonast er til að hann efli enn frekar leit og björgun úr snjóflóðum.

Á æfingunni nota tvær þyrlur LHG snjóflóðaleitarbúnaðinn til þess að staðsetja gróflega „fólk“ í flóðinu og undanfarar úr björgunarsveitum Slysavarnafélagsins Landsbjargar koma því til aðstoðar.  „Sjúklingarnir“ , sem eru 10 talsins, verða síðan fluttir í greiningarbúðir í nágrenninu með þyrlu og þaðan á sjúkrahús í Reykjavík.
 
Um 30 undanfarar úr björgunarsveitum eru að störfum, Björgunarsveitin Suðurnes er með sjúkratjald þar sem greiningasveit Landspítala háskólasjúkrahúss sinnir 10 „sjúklingum“ sem eru í og við flóðið.
 
Æfingin hófst í morgun og klukkan átta með undirbúningi en byrjað var að leita klukkan tíu.